2008-02-23

　　21日下埔大約五點，我參好朋友阿香姐妹到設置南科的台灣燈會會場，雖然停車場的場地非常大，但是開入去公用停車場遂費了真濟時間；因為出口抑規劃了無好，所以看完花燈欲開離開停車場，又是大車陣親相打結攏擠作夥，又費了真濟時間才離開現場。

　　天還未暗當然是先踅小吃區，應該講台南所有出名的小吃攏有，三個本來就愛吃的查某人，當然是一攤吃過ㄧ攤吃到真歡喜。

　　填飽腹肚天色抑暗歡歡喜喜進入花燈區，這擺因為場地曠大，燈會的規模真的比往年較大，遺憾的是無架懸一個適當的表演台予國內外的藝術團表演；所以除了貴賓座的彼些大官貴族，佮少數幸運跂置表演場邊的民眾有法度欣賞著難得的表演之外，其他攏只能聞其聲不見精采的表演；真濟愛翕相的朋友跂未起去翕相記者台，只好置土跤頂空架翕相機聞聲吐大悸！

　　主燈金鼠造型毋是真可愛（平常貓鼠本來就是人見人拍，當然就真難做出可愛的模樣吧），今年比較遺憾的是我未記智我的舊型相機昧使拉近來翕；所以返來檢查相片的時才發現相片大部分攏翕失敗，抑才想起這台老相機的光學變焦功能真差。整理出幾張毋是拉近翕的相片與大家分享今年『2008台灣燈會』。