全新婚宴場地

轉眼間又去到五月，時間過得好快，一個婚禮真係會令人覺得一日48小時都唔夠用，我同男朋友呢幾個月都周圍去睇婚宴場地、出門酒店、參加婚展，睇下酒席等。講真，個人真係好攰T_T，不過好彩有好多野都可以上大家嘅blog睇下，就唔使我行咁多冤枉路。

其實之前我睇嗰兩個場自己都好滿意，但係長老們好想我哋搵個喺九龍區或者港島區嘅場，咁我就唯有繼續再努力搵啦！所以嚟緊嘅呢個月都係我哋嘅睇場月！ 睇咗順便分享埋畀大家，呢個場係之前有B2B介紹我，以地點來講佢絕對冇得輸！ 喺尖沙咀The ONE入面，離地鐵站B出口只係5分鐘路程，仲好近我屋企！佢喺The ONE 12 樓，仲有專lift直上， 賓客嚟婚宴同走嗰時就唔洗同其他樓層嘅人迫，非常方便又貼心。 呢度有兩個主要嘅宴會場地，兩個場都係高樓底。

先講講東海廳，呢個場完全冇柱超開揚，而且佢係以闊為主，就算賓客坐到最後一位，都絕對唔係山頂位，而係握手位，非常清楚咁望到個台！呢一點我自己好滿意！ 加上佢成個場都係落地玻璃，如果擺午宴嘅話，個景會好靚！ 而晚上既話，個玻璃窗係寶藍色，玻璃透出去可以睇到夜景，我覺得開揚好多~

而且佢係以白色同粉紅色為主，金色枱椅，浪漫得來又夠grand! 我啲相都係用手機影，出黎嘅效果都好唔錯，到時應該會好滿意!