大甲全家族農場

主要的農作物是火龍果，

家族成員各人有各人的事業咧拍拼，

利用歇睏日回鄉共同合作種作。

5月28日禮拜日下晝我去參觀，

規模無偌大的農場誠有心，

用「無毒農法」提供親情朋友安心的果子，

火龍果、菝仔攏愛一粒一粒套袋仔，

日頭足猛嘛是要照起工做穡。

土地賜予咱好食物，

照顧果子，看顧土地和晟養囡仔攏愛細膩，

莫傷害臺灣的土地，

土地健康咱人才會勇健快樂。

《菝仔套袋仔的方法》

1.菝仔開花結子就一定愛套袋仔，

若無會去予蟲豸食去。

先共蒂臍轉掉，蟲仔才袂覕佇內底，

菝仔大起來蒂臍嘛較媠。

2. 將網仔較狹的這爿套入去，

較闊的向頂面，

菝仔大的時才有位通好弓開。

包袋仔的時愛過葉仔，後擺欲挽較好挽。

過葉仔拍一个結，閣再拍第二个結。（平結）

過葉仔拍結，果子咧大的時有通好至力，

無葉仔通好至力的，較會曝日的攏挽掉。

套菝仔專用的塑膠袋仔有空，

所積的水分會使退出去，菝仔才袂爛去。

3. 一椏差不多留兩粒菝仔就好矣，

若留傷濟粒菝仔袂大粒，

營養無集中菝仔較袂甜。

火龍果嘛是愛一粒一粒套袋仔，

咱有好食的果子愛感恩，

有影是『粒粒皆辛苦』。

↑套袋仔的菝仔欉

↑菝仔花，白色的花蕊真古錐。

↑紅棗

↑藍莓

↑茄仔

↑蜘蛛，

↓園裡有各種蟲豸

↑露螺

↑百香果

↑木瓜

↑匏仔，五月匏

台語俗語：

正月蔥，二月韭，三月莧，四月蕹，

五月匏，六月瓜，七月筍，八月芋，

九芥藍，十芹菜，十一蒜，十二白。

↑蕨貓

↑塗豆

↑↓火龍果

↑小朋友畫的作品「全家的手」

↑欲暗仔，日頭欲落海囉！