 
字體：小 中 大 |
|
|
|
| 2007/02/17 17:48:18瀏覽909｜回應2｜推薦3 | |
1 三個透早加一工，三年勤儉加一冬。
解說：勸人勤、儉，拍拼。 2 花食露水，魚食濁水，人食嘴水。（班超：水清無大魚） 解說：人若好嘴有禮貌，著親像食濁水的魚遐肥，有露水庇蔭的花遐娞。 3 坐乎正，得人疼。 解說：勸人正直乖巧。 4 歹竹出好筍，好竹出龜碖。 解說：人，好好孬孬，免驕傲猺擺，嘛免怨嘆淡志，有時攏是命運底安排。 5 心歹無人知，嘴歹上厲害。解說：勸人講話愛細膩。 6 樹頭若企有在，毋驚樹尾做風颱。 解說：事事項項照人情義理，著什物攏毋驚。 7 草仔枝，嘛會 牙（khe5）倒人。 解說：就算弱勢，嘛愛尊重。 8 一粒米，一（百）粒汗。 解說：勸人愛物惜物，知恩感恩。 9 一樣米，飼百樣人。 解說：人攏是無共款的，意見做法無相共，免奇怪。 10萬事，起頭難。 解說：這是新鮮人、新鮮事難免的心理。 11有人興燒酒，有人興豆腐。 解說：每一個人攏無相款，攏是獨一無二的。 12食人一斤，抑著還人八兩。 解說：人愛知恩，愛有想欲回報的心理。 13生雞蛋無，放雞屎有。 解說：對使人厭羶的人所講的話。 14一枝草，一點露。 解說：天生我才必有用、天無絕人之路，愛珍惜、尊重生命。 15死貓吊樹頭，死狗放水流。 解說：這是迷信，無衛生、無環保觀念的一句俗語。 16倖豬夯灶，倖子不孝，倖查某子歹落人的家教。 解說：教育子女，愛遵照人情義理未使寵倖，寵倖不但會害著被寵倖者，嘛會害著寵倖者。 17平時無相找，相拄講無話。 解說：朋友之間，有來有去，關係密切，才有共同的話題。 18龍交龍，鳳交鳳，癮龜的交當戇，三八的交叮咚。 解說：什物款品質的人，交什物款品質的朋友。 19種著歹稙望後冬，娶著歹某一世人。 解說：結婚大事是一世人的代誌，毋是辦姑家夥仔，未當笏笏的重來。 20學好三年，學歹一時。 解說：做好事、做好人是久久長長的代誌，做孬作歹卻是一目囁仔、一個念頭的時間而已。 21入山看山勢，入門看人意。 解說：目周剝互金，什物時陣，著愛做什物代誌；碰著什物人，著愛講什物話。 22在生敬一豆，卡贏死後拜豬頭。 解說：等父母過身去才開始友孝，膨派祭拜，無意義也無路用。 23飼子無論飯，飼父母照算頓。 解說：這是恥笑不孝子女毋知感恩圖報的一句話。 24細漢偷挽瓠，大漢偷牽牛。 解說：細漢做賊仔，大漢著變大賊強盜，台人放火。 25輒罵未聽，輒拍未驚。 解說：教養子女愛適當拄好，講求效果才是。 26歹瓜厚子，歹人厚言語。 解說：通常，歹心的人，上愛吱吱噈噈，講未煞。 27少年未曉想，食老毋成樣。 解說：少年矇懂放蕩愛日月，食老就會淒慘落魄。 28娶某毋娶買臣妻，嫁尪毋嫁百里奚。 解說：漢朝買臣妻，看無起猶未出脫的散赤尪；周朝百里奚，富貴的時未記得故鄉照顧父母子女的柴耙某。 29娞花佇別人叢，好某佇別人房。 解說：這是一種「外國的月娘卡圓」的心理描寫。 30三撿四撿，撿著一個賣龍眼。 解說：心頭掠無定，撿啊撿，撿規半埔，煞來撿著普普通通的貨色。 31食甲拄鰓，人著懶屍。 解說：魚仔食，毋知飽，時常食甲拄著鰓，甚至食甲脹脹死；人呢？食傷飽的時，著會懶屍懶屍，無想欲振動，無想欲做功課。 32人情留一線，日後好相看。 解說：做人做事，攏愛留一寡仔空間、情分，互人進有步，退有路，日後相拄，才未歹看面。 33驚某大丈夫，拍某豬狗牛。 解說：某，攏嘛為著尪好，才會se3se3唸，才會歹面腔，理性的男子漢大丈夫，當然會尊重某的觀點講法；動不動就拳拍腳踢，he1著親像土人，親像禽獸彼一款。 34賜子田地，不如教子一藝。 解說：田地真濟留予序細後代，造成貧憚毋討趁的個性，甚至歹子浪蕩，擱卡濟的田地嘛守未著；不如教子讀冊學功夫，知也勤儉打拼，安呢才會久長。 35姜太公釣魚，離水三寸----願者上鉤，毋願者回頭。 解說：姜太公釣魚的人生是輕鬆的、自由的、快樂的，無強迫加箸愛甲著的痛苦，嘛無強迫別人做甲到的麻煩。 36橫柴夯入灶。 解說：做人做事橫行霸道，毋講道理硬拗。 37鴨蛋卡密嘛有縫。 解說：勸人歹話未使講，歹事為使做，因為無論按怎，別人早慢會知。 38嫁著青瞑尪，梳頭抹粉無采工；嫁著做工尪，日出日入才見人；嫁著讀冊尪，三日無食也輕鬆。 解說：鬥句話，嘛是現實的描寫，認份認命就是。 39圓仔花毋知醜，大紅花醜毋知。 解說：娞和醜，加箸認定以外，愛擱參考別人的意見，陷入毋知醜和醜毋知的情境，是會笑破人的嘴孔的。 40夯頭三尺有神明。 解說：勸人好事加做寡，歹事減做寡，因為神無所不存、無所不在底監督咱。 41草地親情，食飽著起行。 解說：莊腳人，莊腳song5，毋知禮數，拄互人請飽，著講欲轉去啊，未曉和親成話東話西話感情。 42惜花連盆，疼囝連孫。 解說：和北京話的愛屋及烏共意思，因為「屋烏」共音，因此甲疼惜厝的心情，連人人認為歹吉兆的烏鴉，著疼惜落去。 43神仙拍鼓有時錯，腳步踏錯啥人無。 解說：人非聖賢，毋通陷入怨嘆錯誤的困境，愛寬諒自己和別人，改過重來就是。 44弱弱（lam2）仔馬，嘛有一步踢。 解說：勸人未使藐視別人、看毋起別人。 45鳥為食亡，人為財死。 解說：感嘆人看待錢財，勝過生命；也奉勸人毋通贏了錢財，輸了生命。 46一仙錢，拍二十四個結。 解說：講人凍酸、ku1sui1、khet4也哥，未大方，錢財有入無出。 47人在做，天在看。 解說：無論按怎，做人做事愛憑良心，因為上蒼攏有底看，會替咱主宰安排。 48乞食趕廟公。 解說：喧賓奪主，人客變主人；無天無理，天地顛倒反。 49細孔毋補，大孔艱苦。 解說：勸人小小缺失過錯，愛瞬改善改過，才未惡化甲無法度彌補的艱苦。 50尪親某親，老婆仔拋車輪。 解說：尪某相好，未記得序大人，害年老的序大人，著愛親像轉無停的車輪彼一款，來走撞。 51天有不測風雲，人有旦夕禍福。 解說：世事難料，當下小心細膩，當下認真打拼，當下幸福快樂就是。 52牛稠內，觸（惡）牛母。 解說：諷刺人對加箸的人使性地、耀武揚威；對外人驚驚縮縮，像腋尾狗。 53未曾學行，就想欲學飛。 解說：做代誌，學功夫，愛一步一步來，才會成功。 54四書五經讀透透，毋識黿鼇龜鱉灶。 解說：人愛謙虛，知識、漢字是學未了、學不盡的。 55有錢使鬼會挨磨。 解說：講人迷信金錢萬能。 56你看我phu2phu2，我看你霧霧。 解說：看輕別人的人，也會互別人看輕。 57爬愈高，跌愈深。 解說：警告人學問職務爬愈懸的時，愛愈謙虛細膩。 58虎頭老鼠尾。 解說：恥笑人做代誌，有頭無尾；頭興興、尾冷冷。 59是毋是，罵加箸。 解說：和人爭執冤家，一定是加箸毋對，責備加箸就對啊。 60娶著好某，卡好做祖；娶著醜某，一世人艱苦。 解說：家庭興敗，和好醜某有絕對的關係，所以男婚女嫁，目周愛剝互金。 |
|
| ( 知識學習｜檔案分享 ) |
