字體：小 中 大 |
|
|
|
| 2008/01/31 19:10:44瀏覽247｜回應0｜推薦1 | |
| 故鄉
故鄉的景緻就親像故鄉的海湧同款，不時佇夢中、腦海中溢來溢去，在國外生活遮濟年，猶是感覺故鄉的水較甜，故鄉的月較明。 聽講故鄉的空氣有較自由啊，頭毛喙鬚白的阿伯仔那行那問路，「請借問中華旅社底佗位」「迄間樓仔厝著是啦」阿伯仔吐一咧大氣，人會變老，故鄉嘛會變，無同款囉，五樓的公寓一棟擱一棟，以早船隻出出入入，下港人、日本人、韓國人、琉球人攏無看著啊，迄咧低低擠擠的三沙灣仔的菜市仔擱有淡薄仔古早的影跡。 中正路行來行去，遐隋的大沙灣海水浴場走佗位咧，「早都無啊啦」同款是頭毛喙鬚白的濟歲人應伊「即嘛改做碼頭甲辦公廳囉」，有影著(to)著(tior) ，人會變老，故鄉嘛會變，以早熱天的時，囡仔、大人上愛來此耍水、泅水，擱較遠的人都攏會來遮蹉跎，迄咧法國公墓、路邊城牆內欲倒啊欲倒的日本宿舍擱有淡薄仔古早的影跡。 沿路車乎乎叫，來去八斗仔行行的嘛好，「請問海洋學院底佗位 」「哦~ 海洋大學喔，這間啦。」，店仔頭的頭家應伊，有影無同款著(to)著(tior) ，行出北寧路的校門，行到望海巷，餐廳、咖啡廳滿滿是，三二步就一間，海水猶原遐青、海湧猶原遐水，天然的海岸、礁石攏消失啊，人會變老，故鄉嘛會變，以早不管時，囡仔、大人上愛來此耍水、泅水、釣魚，反(ping)石頭掠蟳仔、撈魚仔、敲蚵仔，擱較遠的人都攏會來遮蹉跎，迄咧長潭尾的漁港擱有淡薄仔古早的影跡。 社寮嘛變啊，有影無同款著(to)著(tior) ，擱加一座新橋偎著，楊仔城的船寮無影跡，皇帝殿的海湧猶原像樓仔厝迄呢懸，排山倒海，一陣擱一陣，半山腰的山路無底尋，聽講山爆掉啊，岩石填海啊，紅毛土滿四界，欲做下水道處理場，海邊的大水柴一大堆，擱有淡薄仔古早的影跡，但是無人抾。阿伯仔吐一咧大氣，猶是夢中故鄉的景緻較水。 |
|
| ( 心情隨筆｜雜記 ) |
