40%的臺灣閩南語節數，自新學年開始，規定要由通過教育部臺灣閩南語語言能力認證考試中高級B2以上的教師任教。各校主管真正頭殼𢯾咧燒，干焦會使回覆頂司一句話：盡力達成，轉來到學校，煞毋知影欲按怎盡力才好。

這个決策有真大的問題，自教育部訂這个期程，配合的措施就攏一直慢幾若跤步。這學期才開始大力推捒認證考試爾爾，新學年就要求愛達到百分之四十，濟濟的學校是正式老師抾無10%，就算攑槍逼所有的老師攏去參加8月份的考試，會當通過幾个人，嘛是佇未定之天；何況證書發落來，已經是2015年囉，無算這學年的額，根本就袂赴飼。

學校欲按怎盡力達成40%的目標咧?

1. 要求校內已經合格的老師，加教幾學年的臺語課。

2. 加聘請較濟本土語教學支援的老師。

問題是，以學年同節施教的條件看起來，毋管是正式老師抑是教支老師，攏愛教二个至六个學年的某一班，才會當衝懸節數。正式老師本土語毋但上濟愛教六節無仝學年的課(備課複雜)，愛閣教滿伊家己其他專門科目的節數。跨科目又閣跨學年，甚至愛超鐘點來教。加這張證書，到底是好抑是歹，是獎勵抑是處罰，用跤頭趺想嘛知。

閣再來就是，既然逐間學校欠合格老師的問題攏差沒偌濟，當然逐校就愛編預算加倩較濟位教支老師來教臺語囉。就算教育處預算支援無問題，是欲去佗位搶遐濟教支老師咧?明年初考試的結果出來，學校內底總會有通過認證的老師，這寡老師敢會使馬上接落去教?按呢敢毋是咧欺負教支老師咧，需要īn的時陣，用姑情的，合格老師有夠矣，就共īn捒去邊仔。

檢采是我想了較無周至，啥人有法度解決這个問題咧?40%的任務，敢有啥物撇步會當按時達成咧?