追思母親

2013.10.04中晝的時請阿母用餐，伊用微弱的聲音講:”

無愛食，下晡就欲離開恁矣，叫恁大姊轉來”，一時間毋知欲按怎，趕緊扑電話予大姊佮每一个孫仔輩，上早趕轉來的是大兄的第二後生，伊拄佇台中出差，閣來是大姐in媽孫仔五、六个人，老母看見曾仔孫咧叫阿祖，誠歡喜，交待我一个人攢一个2000箍的紅包予in,陸陸續續趕轉來六、七个曾仔孫，攏領著紅包，枕頭下猶藏一个紅包，我知影伊掛念我彼个出世二個外月，猶毋捌見過面的孫仔，五點外媳婦tshua7孫仔轉來到厝矣，共囥佇阿母的眠床頂，伊用慈祥溫柔的眼光一直共看，伸手去共牽手蹄仔，共伊booh佇胸前，無偌久外孫嘛到厝矣，領著紅包，提一粒雞胿仔欲甲阿祖耍球，一个佇眠床頂，一个佇眠床跤一來一去，耍甲誠歡喜，一家口有九个孫，九个曾仔孫，齊齊來眠床前，鬧熱滾滾，煞袂記得艱苦，若像過年一家團圓仝款，精神特別好，病也好起來矣!

老母長期以來初一、十五食素齋，明仔載初一，頂禮拜自增師父共伊開示了後，伊聽會入去，下一願欲食長齋，欲綴唸佛機唸阿彌陀佛，師父開示的時共伊講，阿彌陀佛的意思是無量光，無量壽，是一句上好的好話，目睭觀看阿彌佛的佛像，喙唸袂出來袂要緊，用默唸就好，上重要愛唸入心，按呢著會感應著阿彌陀彿的願力，就親像插頭接到阿彌陀佛遐，通電了後，就會得著感應。

開示(五歌韻)

無量壽光阿彌陀，眼觀默唸入心窩，

猶如插座流通電，出世法門殊勝多。

初五初六拄好拜六禮拜，就像以往歇睏日囡仔轉來，禮拜日下晡，逐个陸續轉去in北部的厝裡，準備明仔載上班。

初六北風透透，有一點仔秋天的涼意，透早六點外，阿母就講欲出去外口loo2 ka3 坐，這是伊這段時間來上大的寄望，厝邊的老同姒會來佮伊坐，毋閣今仔日傷早，坐一睏仔等無人，就閣入去房間歇睏矣，一工無事，到彼暗點外鐘，病攑起來，趕緊送基督教病院急診，醫生檢查了後，調出病歷看看咧，講時間到矣!隨時有可能轉去，發落救護車送轉來，毋甘共伊徙去廳裡，閣共伊tshua7入去佇房間內，大姊轉來了後，共老母攢的老嫁粧穿起去，自增師父四點外嘛趕到矣，發落共老母徙到廳裡，師父tshua7逐个唸佛，看著阿母病苦漸漸減輕，逐个人更加用心唸彿，下晡彰基的琬窕護理師來看阿母，伊簡單檢查了後，交待我適時愛共心內的話講出來，才袂後日遺憾，轉去了後無偌久，伊閣提一射筒的麝香精油來，叫我共伊抹額頭、鬢角佮人中，會予序大人較舒爽，琬窕護理師共阿母當做家己的序大人照顧，予我真感動。

唸佛經過二十外點鐘，這段時間老母真安祥，目頭真少有結起來，雖罔逐个攏真忝，毋閣毋敢歇睏，暗時點外，看阿母喘氣漸漸減慢，半點鐘共量一改血壓，98，88，77，閣來就量袂出來矣，共節脈，漸漸微弱，三點一到，呼吸停止，阿母捨掉報身，離開佇伊邊仔唸佛的囝孫仔，師父交待往生了後，毋通共伊徙振動，毋通吼(háu)繼續唸佛十六點鐘，三點半大姊佇外口埕裡大聲喝”緊來拜佛祖!佛祖來矣!”出去到埕裡一陣陣的沈香芳味，充滿其中，趕緊合掌唸阿彌陀佛，天降異香，四點出仔，天頂落五分鐘屑屑仔雨，毋捌這是啥物狀況，請示師父，師父講:是佛祖座前的護法神，感應著唸佛的虔誠，來巡視帶來的天香，甘露普施，叫逐个繼續唸佛。

詩讚(下平七陽韻)

陣陣徐風送異香，普施甘露柳枝揚，

阿彌佗佛聲聲唱，手執金臺並放光。

這幾工以來，經歷阿母病情漸漸沉重，知影這工無遠矣，雖然心內艱苦，一直毋敢表露出來，想起過去的種種，歷歷在目，樹欲靜而風不息，子欲養而親不在，寫一首詩追思阿母，毋敢用傷悲傷的字詞，偷偷走出去外口，吟這首詩，吟到一半，無法度控制情緒，目屎流落來，匼咧桌仔用tshngh的，發洩壓抑誠久的情緒，毋知偌久，後生徛佇後壁，共我捋尻脊骿，雖然無講話，我知影伊的意思，心情敨放嘛得著安慰。佇停柩期間，遵照自增師父的指示，七七期間早、中、暗課頌經唸佛，向望自增師父佛事功德，予老菩薩順利到西方極樂世界，聽經聞法，免墮六道輪迴，早證佛果。阿彌陀佛!

        追思(四支韻)   

            仙凡路隔憶先慈，   茹苦含辛晟幼兒，

            訓誨有成心盡瘁，   劬勞無怨病偏隨。

            皈依三寶長齋素，   徹悟因明免嘆悲，

            解脫紅塵歸佛國，   西方極樂入蓮池。