剖腹見真情的愛情故事

【宋詞】  釵 　頭　鳳    陸　遊 

紅酥手，黃滕酒，滿城春色宮牆柳。

東風惡，歡情簿，一懷愁緒，

幾年離索，錯、錯、錯！ 

春如舊，人空瘦，淚痕紅浥鮫綃透。

桃花落，閑池閣，山盟雖在，

錦書難託，莫、莫、莫！　　

陸游，字號放翁，現主時浙江紹興的人。十二歲就會曉詩文。伊一生上掛慮的是中原未收復，欲過身的時留有《示兒詩》：「死去元知萬事空，但悲不見九州同。王師北定中原日，家祭無忘告乃翁。」真濟人稱呼伊做「愛國詩人」。

      這首《釵頭鳳》是描寫陸游佮唐婉一段無緣的婚姻。陸游20歲參唐婉結婚，想未到當時的人認為女子無才便是德，唐婉的才華佮陸游的親蜜感情，引起陸游怹老母的不滿，就強迫陸游愛離緣。離緣了後，陸游揣一間厝予唐琬蹛，時常去參伊相見。無偌久予陸游的老母發覺，姑不將就來拆分開，尾後陸游閣再娶，唐琬嘛閣嫁人。誰知，情深緣淺的即對戀人煞佇5年後城南禹跡寺的沈園意外相逢，唐琬經過翁婿趙士程同意，用酒菜招待陸游。

      陸游回想即段姻緣，非常的感歎，就佇沈園的壁頂題了即首《釵頭鳳》。後來，唐婉聽人講陸游佇沈園題了即首詞，伊專工閣去沈園看了即首詞，嘛和了一首詞，轉去無偌久就鬱悴、悶悶不樂別世。我用台語翻寫了陸游即首《釵頭鳳》： 

嚮時，汝伸出紅牙柔軟的手枝

誠意敬我一杯清芳醉人的黃封酒

佇滿城翠青艷麗的景色當中

汝親像靠佇宮殿偏僻的牆仔邊彼幾欉柳樹

搢著春風  搖著消瘦軟弱的腰枝

是按怎，粗殘的東風共阮害

扑破姻緣，歡情變冰冷，雙人變孤影

干礁留落滿腹的苦嘆，綿綿的憂愁

啊！錯了！錯了！錯了！

猶原是春天  美麗的景色並無變

汝亦是像蓮花赫爾出色

紅顏因分離  消瘦落肉，珠淚輾輾遨

汝拭著胭脂佮目屎的絲巾仔，已經澹漉漉

凋謝的桃花一片一片對懸頂落落來

水池樓閣空空無影跡，一遍淒迷

海誓山盟亦常在，深情亦無減

只是，拆散了後的相思，欲寄對佗去

唉！罷了！罷了！罷了！ 

    釵 　頭　鳳     唐　婉 

世情薄，人情惡

雨送黃昏花易落

曉風乾，淚痕殘

欲箋心事，獨語斜欄

難！難、難！　　

人成各，今非昨

病魂長似秋千索

角聲寒。夜闌珊

怕人尋問，咽淚裝歡

瞞！瞞！瞞！

台文譯寫

世情薄，人情冷

落雨送走一工一工的暗晡

春天的花蕊真緊就蔫去

早起時猶澹濕的花莓隨予風吹凋去

昨夜流過目屎的面容   亦一迹一迹

批信想欲寄相思，揣無人通好迵心講

凭踮欄杆，孤一的人心神恍惚踅踅念

唉，人生，難啊！難啊！難啊！ 

一人行一路，即久不比早前

荏身心碎的痛疼，像韆鞦晃來晃去無停止

號角歕出來的聲，一聲一聲使人愈畏寒

長躼躼的暗暝  將近消失

驚人問東問西，姑不將忍著目屎毋敢輾落來

勉強裝出笑容  鬱悶在心內，

唉，心事，瞞吧！瞞吧！瞞吧！ 

宋高宗紹興25年（1155）春天，有一工陸游出遊來到沈園，無意中參唐琬翁某相逢，唐琬以酒食款待，使陸游一時憂傷滿懷，久年來的相思、感歎，一下仔暴出來，題了「釵頭鳳」一詞。

       彼時陣陸游已經31歲，除了懷念佮唐琬彼段深情蜜意，閣對封建社會婚姻的無自由，造成悲慘的命運，充滿了怨恨，也對唐琬的不是，表達了有愧。「東風惡，歡情薄」，即兩句正是對現實殘酷的戲弄，發出無盡的喊喝。

才女匹配才郎，兩人情投意合，本成是人間上夆欣羨呵咾的一對佳人，啥知受著陸游老母的壓迫，煞來拆分開，莫怪唐琬赫呢悲嘆：「世情薄、人情惡」。

    彼當時離婚的女子，毋但身心受著創傷，佇社會上嘛予人指指揬揬看未起，莫怪伊佇「夜蘭珊」時，閣「怕人詢問，咽淚悲歡」，驚人詢問，忍著目屎毋敢流出來，閣再假做無代誌，歡頭喜面，內心的折磨，親像火鼎咧煎、咧煮，彼一款心境的艱苦，真使人同情。

佳哉有一位心存忠厚的趙士程肯接納伊，趙士程並無因為伊改嫁來輕視伊，兩人閣相招到沈園設宴遊賞，可見趙士程對伊嘛是深情對待，兩人感情未痞。即番相見，煞平地起風波，唐琬面對真情對待伊的兩個查甫人，頭一個是舊情綿綿，山盟海誓的舊情人，如今真情猶在。一個是伊心存感恩的查甫人，恩重如山。以感情深淺來講，唐琬對趙士程難免有所自責、慚愧。情的牽纏變成重擔，即擺佇沈園相逢，煞予唐琬受著真沈重真艱難的折磨：「病魂常似秋千索」，無偌久伊就肝腸寸斷，傷心過度別世。情愛的執著，煞淪落即款下場，留下感偉大動人的愛情故事佮詩詞，八百五十幾冬來流傳到今。

陸游確實是一個重感情的人，44年了後宋寧宗慶元五年(1199)春天，伊已經75歲，有一擺閣舊地重遊沈園，見景傷情，無限的哀思、心碎，寫了「沈園」兩首：

城上斜陽畫角哀，沈園非復舊池臺，

傷心橋下春波綠，曾是驚鴻照影來。 

夢斷香消四十年，沈園柳老不吹綿，

此身行作稽山土，猶吊遺蹤一泫然。 

意思是講：暗晡的夕陽照佇城池，號角歕出淒涼悲哀的聲音，沈園的水池、樓閣已經無親像早前的嫷。橋跤流水青青的波浪，使人傷心欲絕，水影浮出著伊嬌麗清秀的身影，叫人伊來咧。

期待嘛未得再相逢，香魂消散40年嘍，沈園的柳樹老甲枝桵隨風嘛飛未振動，我的身軀嘛強欲變做稽山的土砂，憑吊舊跡欲揣汝的身影已經無可能，忍未椆年老的目屎像針線輾輾翱，流未停。

台語詩人《愛的真言》按呢寫：「無論世情按怎演變，滄海是毋是變桑田，干單一句話對汝講，汝是即世人唯一，不變的愛。」陸游舊情到老猶原無改變，有一絲仔氣佇咧，就未放棄對伊深深的愛佮思念，怹的真情確實使人感動，真情的詩詞文學，嘛使人感動、心酸。近代陳衍佇宋詩精華錄就講：「無此絕等傷心之事，亦無此絕等傷心之詩。就百年論，誰願有此事？說千秋論，不可無此詩。」釵頭鳳的故事佮詩詞，必然留傳千古予人數念。（2007.01.10.）