這是啥物的社會！搶錢，搶荏身老大人的錢，可惡至極！

　　有一個笑話，一個法官真好，犯罪予伊辦著，若認錯，攏會判足輕予伊自新機會。毋過法官的牽手認為「亂世用重典」，社會已經亂絞絞，原諒歹人，煞未當幫助著好人。法官的仁慈，社會的偷搶劫並無較少，反倒轉閣較嚴重。翁仔某定定為即項代誌冤家，法官性地好，牽手大聲伊無聲，日子總是平靜仔過。

　　一暗，食暗飽，看一睏仔電視新聞了後，法官的牽手去無閒洗衫拚灶腳整理家事，法官去書房趕寫明仔載欲宣判的判決。十點，法官拄寫好判決，牽手空課嘛款好勢，兩人做伙去厝邊的公園散步。

　　散步轉來，牽手慘叫一聲，門已經予人拍開，牽手衝入去房間，房間底茹氅氅，牽手的金仔、玉仔、現金攏無了了，損失慘重。牽手是哭甲死來昏去，法官共安慰，牽手煞起屁面一直罵怹翁捶怹翁，講攏是怹翁害的，怹翁一直會不是，一直共安慰，尾仔警察來調查、問筆錄，牽手才恬靜落來。

　　警察走了後，牽手閣起花，共房間門關咧毋予怹翁入去睏。法官只好轉去書房，心內真鬱悴，對賊仔是愈想愈凝、愈氣，閣看著寫好的竊盜罪判決，一氣著共原本判二月徒刑的月改做年，就是改判做二冬啦！