 
字體：小 中 大 |
|
|
|
| 2024/04/15 19:13:46瀏覽28｜回應0｜推薦1 | |
| 風勢到這嘛輕聲細說
驚吵到時間置寐一下 只有厝鳥仔窸窸窣窣 置講廟口戲班搬的前朝事 北管文武場是怎樣在車拼 響滿天七彩的聲 有淡薄啊酸甲一絲絲的悶 無人相借問繁華鬧熱的彼個時袸 開枝散葉的門埕嘛是日夜無分 一齣擱一齣的故事講嘛講袂停困 講幾甲東的田園一區一區變做漁塭 粟山稻海的景色變成稀微的心酸酸 公媽的目啁著等到年節清明才有光 莫怪子孫世小對阮是哪來是哪青份 清香三叢薄酒一杯四果飯菜齊齊放 跪置紅格桌腳的金孫講請阮斟酌聽 這區薄田放置咧閑實在有影拍損 再三跋杯叫咱無論如何要允准 門神啊你跂彼呢久腳咁會酸 咁有想過要稍休睏？ 咿咿唔唔的門扇板你咁有打算 有一工天攏勿會擱光？ 風勢到這嘛輕聲細說 大氣嘛毋敢稍喘一下 山擱卡高黃昏的日影嘛是會過 水擱卡長流去的日子嘛勿會擱回 |
|
| ( 創作｜詩詞 ) |
