阮厝邊的鱸鰻

講伊比海翁卡大隻

咁有影是水雞轉世

也是專業食銅食鐵

兼食阿魯米

阮厝邊的鱸鰻

卡早真散赤

連鬼嘛毋敢掠

住在內籬底四界風聲

風聲阮嘎伊仝祖公祖嫲

越頭連公媽桌攏請入火鼎

擱請孔子公嘎關老爺

同齊去作伴

阮厝邊的鱸鰻

這馬手骨粗錢聲飽

三不五時着放幾隻火雞嘎番鴨

肖想欲重牽界址線

橫面惡語叫阮要参加

彼個無人性的會社

蛤，這是啥米款惡霸

喔！這是鱸鰻的手段

咦！咁講天公伯無看

嗯，時間尚知影輸贏

哼！阮的掃帚柄擺在門口埕

吼！阮的畚擔嘛仝款亢置遐

哼！阮的胸坎刺着福爾摩沙

吼！阮的家園永遠值得拼命