●〈台語四行詩十首〉◎李瘦馬

1〈一隻蝶仔飛入我內心的花園〉

彼隻蝶仔

歇佇上媠的彼蕊花

恬恬佇想：

誰人的花園親像曠闊的內心

2〈我佮天頂的雲鉸落來〉

貼佇囡仔的畫圖紙

伊的畫面就有雲的影跡

我恬恬欣賞囡仔畫圖

一隻鳥仔無張持飛入伊的風景區

3〈予鳥仔聲挲過〉

無為什麼坐佇遮

鳥仔嘛無為什麼佇，啾！啾！

鳥仔聲，一粒，一粒

落佇阮耳空

4〈靜心寺前聽雨〉

一滴雨嘛攏無

我的心土卻是澹的

敢若看見，舊年的我猶原徛佇遐

聽雨，稀微的記持……

5〈用阿母講的話寫阮內心的風景〉

每一字攏親像磚仔角

位心肝頭搬出來

用阿母的聲調讀出阮的向望佮悲傷

一隻鳥仔輕輕軁過樹林聽到生命的聲音

6〈風吹過妳的頭毛予我鼻到愛情的芳味〉

妳徛佇風頭，風佮我講

妳昨昏用玫瑰花的芳味洗頭

愛情是無法度講出來的芳味

我佇時間這頭，妳佇彼頭

7〈徛佇時間的河邊〉

風  溫柔的手

輕輕挲著我

內心的水面

一隻白翎鷥  曠闊的天地

8〈啥人會當聽著時間的水聲〉

歸下晡，坐佇溪仔邊

時間是無法度聽著的水聲

彼个人，坐佇溪仔邊釣雲

魚仔，泅過敢若玻璃的水面

9〈長巷〉

月娘佮伊的光掖甲規條巷仔

查埔囡仔牽著查某囡仔的手

青春背影佇我這款年紀看來

淡薄仔稀微淡薄仔歲月蒼茫

10〈你問我，我的詩到底佇寫啥物〉

譬如講，一隻蝶仔飛入我內心的花園

譬如講，天星是思想的火金姑

我用詩，寫精神的相會

佇萬物中看著美麗的眼神