2016.02.06

昨下晡想講欲放假矣，暗時袂睏得無要緊，就啉咖啡。

上無聽一、二十條ê歌，猶未睏去。

睏去ê時，大概是兩、三點矣

佇真深ê睏眠內底，地動硬共我叫精神

想欲閣睏...睏袂去；無睏、袂使得！

驚地動閣再來，用棉被蓋到頭殼頂

想著SARS事件失去控制，一直湠開ê時

我驚甲生活跤步失去次序

彼時阿爸佇電話講一个故事安慰我

伊講…

有一群羊仔佇闊野生活，逐年，攏會有一隻大野狼來咬一隻羊仔去食

羊仔知影，彼是怹無法度抵抗ê災難。

大野狼若來，怹tō共頭ànn咧，出在大野狼來選一隻。

阿爸講，閃袂開ê災難，面對伊；閣再講，大野狼揀著ê，嘛無一定是咱！

想阿爸講ê這个故事了後....tō睏去矣！

透早精神，規身軀汗；因為自跤到頭，覕佇厚厚厚ê棉被內底。

我平安！希望汝嘛平安。

無論發生啥乜代誌...阿爸攏袂閣講故事安慰我

我共伊講過的故事...記佇心肝..定定餾來聽