出去看，才知影頭殼內底貯的，是無更新的資料。
頭一暝去蹛香客大樓。
掠準是參香客睏總鋪。
原來是廟寺經營的住房，除了無提供早起時的［把費］，收費佮規模參飯店類似。
房間真大，設備嘛誠四序。
可惜，半暝傳來緊快徙位的跤步聲。十二點、二點、四點….，大概是趕進香團的行程吧。
飯店的窗景看出去，有海，想起津輕海峽港口，有海鳥唱歌的住房。
遮無海鳥，煞有毋知對佗bùn出來的薰味，一暝予伊tsa̍k甲精神幾何遍。
第二工去蹛台糖出租的宿舍，陽春的住房，安靜、清氣。阮一醒到天光。

參姐姐怹出外，所有的困難攏毋是困難。
像講，有障礙的住房、著行遠路的景點、兩个阿姐是我的［無障礙設備］。除了容易疲勞的體力袂當代替之外，其他阿姐怹攏有才調共我thèⁿ牢咧。

屏鵝公路照講是海景真媠的所在，佇電影內底看過，足數想來遮行一tsuā，來到遮煞拄著海佮天攏殕殕的bái色，看著心情嘛綴咧變沈落去。
佳哉車轉向東爿行了後，全然無仝的風景，是曠濶明朗綠色的山佮雲。

感謝阿姐怹滿足我這个愛耍小妹仔的心願。

𨑨迌是真忝的代誌，欲來去歇睏矣！
儲備體力，期待下一次的旅行。
無論是春天、無論是秋天。

可惜，長長長的屏鵝公路攏翕無理想的相片。大概是叫咱後擺才閣來.....