2019.09.05

昨早起上班唯厝裡出來的時，是好天

巷仔出來行台3線，對向市內來騎車的人攏穿雨幔，心內猶咧問：怹是佗來的？
倒斡停頭一个紅燈，頭前的路是澹的，雨mî-à略仔咧滴，較遠遐，咧落雨。隔一條街仔好天、歹天分兩爿，原來是這个形！
　
中晝時仔歇睏轉去的路裡，日頭曝甲會疼。
睏晝的時雨用潑的，sà-sà叫。
莫睏，較早出門咧。

雨幔穿咧戰車慢慢仔騎。

雨滴佇雨幔的聲
引我倒轉去彼年佇仁愛學校
國校仔有一遍上課進前，外口落大雨，老師舉一支雨傘來上課。
阮這世人雙手是負責舉柺仔爾，毋捌提過雨傘，足想聽雨滴佇雨傘的聲，就共老師借雨傘，雨水滴佇雨傘頂頭tit-tit-tat-tat有力閣好聽。
　
時間到矣，老師講：入來上課！
我想欲閣聽，無隨入去
老師講：閣毋入來欲記曠課哦
我皮皮仔，無要無緊，因為我知影這个老師性地真好，閣耍一時仔才入去上課。老師無記我曠課。
　
過無幾日，雨水期，露螺仔趖甲滿四界，兩个同學佇教室頭前的園仔邊耍露螺仔，仝彼个老師的課，叫怹入來上課，若無欲記怹曠課。
怹無咧聽，繼續耍甲歡喜才入來。
下課去掀點名簿仔，大聲抗議：老師妳偏心，妳較疼查某的！
　
我袂記得後來老師按怎處理。毋拘到今過幾何十年矣，我猶會記得彼个老師的名。

伊對學生足有耐心，甚至捌共伊tuā-báng頂頭備用的鈕仔剝予我。因為我上課一直相伊的鈕仔，想我貯鈕仔彼个khok仔內底，無這粒遮媠的鈕仔。

彼陣仔我是一个足愛抾鈕仔的查仔囡仔。

* * *

雨mî-à=小雨滴
sà-sà叫=沙沙叫
tuā-báng=大衣
khok仔=盒子

**相片是網路掠的**