我想起細漢時，天未光，烏鶖就佇閘門跤彼bô͘竹欉頂頭kà-ke-kiu、kà-ke-kiu叫袂停，阮兜無時鐘，阿母聽著烏鶖的叫聲就起床，入去灶跤款早頓，予阿姐怹食飽去學校讀冊。
煞落捾phun飼豬，厝內款款咧，有時佮阿爸去田裡做穡，有時共我偝咧kōo行的，對田尾仔去寶斗仔予卓小兒醫我的跤。
阿母若偝我去寶斗仔，會行田岸仔路。
大漢了捌聽阿母講起，有時仔行甲tshuì-ta，想講等一下若經過人的田頭，有囥茶鈷的所在，才來共人討一碗滾水啉，毋拘等甲行倚的時，歹勢開喙。
就閣想講，lak-tē-á閣有幾角銀仔，無，小等咧斡角遐有一間跛跤店仔，才來共買一節仔甘蔗來止tshuì-ta。等甲行到店仔口，煞毋甘買。想著厝裡頭喙hiah濟个，靠幾分仔地種作，本成就散食，為著醫這雙跤，厝內無夠開銷的代誌，早就毋敢去想矣，每一分錢，攏袂使拍損。
就按呢，lún著tshuì-ta佮流汗，轉來到後壁園仔大伯怹兜，阿娘會坐佇怹岑簷跤的椅條歇喘一下，阮叔伯阿嫂會去thîn一碗滾水予阮阿娘啉。阿母講，彼碗滾水啉落去，就有氣力行轉來到厝裡矣。
☆ ☆ ☆
尾暗仔六點外，日頭欲落海矣，你想著啥？
我想起佇厝頭前的肉豆仔棚的下跤，耍塗、耍沙，大姐佇灶跤煮暗頓，二姐hiânn熱水予阮洗身軀，等阿爸、阿娘唯田裡轉來的時，雖然天攏暗甲看袂清楚怹的面，毋拘對阿母講話的聲，阮得著一種來自母愛的温暖，彼免用目睭看。
暗頓食飽，阿爸會坐佇間仔參人講話，有阿伯、有叔伯阿兄、有當時仔蹛庄內的表叔嘛會來揣阿爸開講。
阿爸坐佇椅仔共我抱咧，跤哪搖、哪講話。
講啊講，有時就會講起這个跛跤仔。
有人問：「汰遐瘦？攏無咧食哦？」
有人應講：「káⁿ-sī kam-tsik！」
阿爸應講：「啊知、都平仔按呢食。」
曾經予人疼惜的情景，雖然遙遠矣
我知影，彼是後來我有才調勇敢行人生路的力量！
日落月升千辛萬苦，你咧想啥？
我想講….來～睏！
晚安。
kōo行的=用走的
tshuì-ta=口渴
lak-tē-á=口袋
hiah濟个=那麼多個
lún=忍
thîn=倒
phun=豬食
hiânn熱水=燒熱水
káⁿ-sī=會是
kam-tsik =疾病名。指小孩面黃肌瘦
字體：小 中 大
