愚伯公                           客家語：四縣

   頭擺，在路潯老榕樹下有座小伯公，以後料涼仔人緊多，路尾又有信徒設立新伯公，兩座伯公離沒幾遠，彼此朝夕相對。

   老仔伯公影到新伯公，時常都有人敕雞埒鴨去燒香，自家仔公堂煞沒人愛來拜，認為新伯公搶走佢食祿，又氣又羨慕。有一日，老伯公專程去拜訪新伯公，請教佢仰會按好每擺諸有大魚大肉吃？

「想辦法呀！」狡猾仔新伯公笑容滿面，但佢沒再講下去。老伯公一路愐等轉，想無出麼個意思。當天日心仔，老伯公啄目睡，矇矓中聽到一煞人氣忿忿仔大聲罵：「跌按多下諸沒神筊！隨在汝來啦…..」拿起一大籃个牲畜拔腳就溜，老伯公想愛喊，但已來不及。

    半夜，老伯公駁夢……..

「枉費汝做伯公按多年，分人一拜就神筊，香客認為汝忒好，對汝就青青采采，汝沒餓死就意好吶，還想吃麼個大魚大肉?」老伯公驚醒後緊想緊有道理。

    老伯公決心改變服務態度，將門面漆得靚靚，凡是來求神卜筊仔不論麼人，都愛先笑三聲(三次笑筊)。沒幾久，歸莊頭个老百姓都傳說老伯公變成癲仔，看到香客只曉得笑，依像嫌大家仔祭品唔厚，略略仔个香客煞全無敢去求神卜卦！

    新伯公仔前堂又再整地，每日外地來个Taxi越來越多，有時還會看到下港專程來个遊覽車，可見佢名聲已遠播全台，真真可腦呀！老伯公斷糧已兩三日，飢腸轆轆又再度去請教新伯公。

「……就按系…….簡簡單單….曉得沒？」影到老伯公瘦剩一支骨，不忍心个新伯公就伏在耳公邊細細聲教佢。

「蛤?????......按系敢做得?....涯..涯..無敢做…」

「無怕啦！汝驚麼个？保證一切都ok了……..」

     有歸個月沒看到老伯公開門，料想必定咪富爺富爺享清福。新伯公回拜老伯公，望不得分先輩額腦一番，但看老伯公一隻腳打石膏，使一支拐杖跳阿跳仔，面迫迫仔勉強來開門，不禁打卵退。

「噎？仰般……？」

「瞎眼係麼？就係汝按會教呀!」

「哦….汝自家目珠無金…還愛怨涯？」

「麼煞知？」老伯公緊搖頭道嘆：「就照汝教仔呀！講麼個伸腳干分佢跌倒，腳骨擙斷，自然就有人會敕雞埒鴨來拜…汝看! 會分汝害死哦…」

「唉，無差啦！但是三更半夜…從個座大樓出來个人，毋好看佢搖搖擺擺，佢平常都食得肥鼓鼓仔，加上賭輸狗，莽莽撞撞…..汝仰般好去干佢？」

「唉! 無使講仔啦....咸衰宵喲…」

「嗨…人家連一稀烏青都沒，顛倒汝擙斷腳骨扶石膏，汝真章毋愛命仔係麼？難怪汝做一生人小伯公，全無曉得變通，仰會升仔起做城皇?」