對科工館出發的第一隊遊行隊伍起行時陣，我對現場搜證的刑警鏡頭比中指，喝：「幹！馬英九！」。一路上人民一邊行一邊「幹礁！」，佇遊行的隊伍內底，我思考資本主義社會講的精英，不過是一群拍算私人利益的糞埽人的結合。你相信智識份子嗎？聶魯達講伊毋是智識份子，我嘛毋是智識份子。如果咱若是智識份子，咱若會對全球物種的消失無起慈悲心呢？咱若會為著推行講仝一種語言，來消滅其它的語言為快樂呢？台灣的大中國主義者若會已經有一个遐大的中華人民共和國會使去認同，閣無欲放過台灣呢？

第一隊遊行隊伍來到美麗島站。我想著前後關二十五冬出來無外久，佇第一屆中華民國流亡政府總統民選時陣，踮高雄市勞工公園彭明敏先生的選舉台跤，對支持者講欲選台灣共和國總統的施明德，不過也是一个佮陳芳明仝款，推捒中華民國流亡政府的糞埽。

我心中上媠的國家的名，我想如果台灣人連建造家己的國家的意願攏無，按呢亻因 準講流亡出去，仝款會予人看袂起，留落來予中國統一的人，也會面對中國虛偽民族主義的清算。

大人娶囡仔做伙行。

阿媽家己一个人的形影，就是「詩」。