社會亂象            

            最近社會大脫序 (sī)      倫理道德囥一邊 (pinn)

            日日新聞報未離 (lī)      種種亂象令人悲 (pi)

            有人放火燒家己 (kī)     有人殘害親子兒 (jî) 
              嘛有集體自殺死 (sí)      抑有摃死兄佮弟 (tī)
              甚至攑刀刣父母 (bú)     駭人聽聞逐工有 (ū) 

            近日朋友傳話語 (gí)      有人跳樓自殺死 (sí)
              遺書留言債務濟 (tsē)     解脫以後免揹枷 (kê) 
              人性軟弱到這低 (kē)     一時失志這愚癡 (tshi)

              有膽跳樓赴陰司 (si)       煞無勇氣活落去 (khì) 

            提醒諸君著增智 (tì)       發揮愛心莫遲疑 (gî)
              身邊親友多注意 (ì )       適時伸手共扶持 (tshî)
              避免失意殘身軀 (khi)    助伊行出過渡期 (kî)

            堅定信心佮勇氣 (khì)    拍拼再創一片天 (thinn) 

            社會亂象需重視 (sī)       全民有責莫推辭 (sî)
              道德重整有倫理 (lí)        精神重建好風氣 (khì)
              潛移默化趁這時 (sî)       互相疼痛不分離 (lî)
              世間溫暖如春天 (thinn) 人情親愛似蜜甜 (tinn)  
              四海昇平好政治 (tī)       安和樂利亂象除 (tî)

 minda 2005.3.3

              附註：

              囥(khn̄g)：放、擱。

              刣(thâi)：殺、割傷。

              揹(phāinn)：承受、負擔。

  上一页