澎湖牛

春天種作犁田走     熱天炎炎歇中晝

秋天收成捷食草     寒天清閒稠內鬥

牛牨目睭光閃閃     頭頂二支角尖尖

大隻勇壯性暴躁     做穡猛掠千百畝

暗頭米酒飲相接     隔工猶是拼未忝

牛母性地較溫和     犁田工夫慢慢趖

主人喝聲伊聽無     鞭若摔落緊趕步

較早做田真艱苦     攏共姨丈借牛母

阿母呵咾牛母好     查某人才押會倒

乖乖聽嘴順順做     骨力做到日頭落

阿母捌講牛牨惡     力頭足飽烏白撞

孤人無法牛索擋     牛犁咸人拖咧浪

抵著咧痟起癲狂     予伊撬著命就亡

牛仔牛仔嗎嗎呼     敢是孤單欲訴苦

科技時代較輕可     免復拖車佮種作

逐工放恁溜草埔     自由自在無煩惱

草埔曠闊空氣好     景色幽美好thit迌

草仔青青大嘴哺     草仔芳芳好落肚

草仔綿綿倒咧翱     草仔軟軟做床鋪

牛仔牛仔嗎嗎呼     搖動尾溜唱山歌

悠悠白雲隨風過     享受自然快樂多

minda  2007.11.3

※註：牛牨（gû-káng）就是牛公（公牛）。