悠悠歲月百餘年

八尺深流脈澈泉

園灌人牛欣飲用

思源銘記在心田

minda 2015.2.20

50年代

潭邊百年古井 -

阿媽講伊食這口井的水過一世人， 阮是食這口井的水大漢的。

阿媽笑微微，坐佇井盤漧，後面即間古厝佇50年代的時，

有蹛陸軍的阿兵哥，環境整理kah足清氣。

89年的上元，阮咸翁婿、查某子回鄉參加阿爸主辦的燈謎會。

查某子對井仔跤足合意的，in爸爸特別共伊翕相留念。

古厝內的銀合歡佮榕仔已經大上厝頂，出牆外囉！

經過將近10冬的歲月，古厝有的所在已經塌落來，榕仔是大到共規個井仔跤

攏蓋掉，榕仔會當大這款型的嘛算是足罕見的，一時心適興，阮招阿元

徛咧古厝前，予二姑來翕相，這馬已經變成歷史的鏡頭。

99年4月初，二台怪手雄雄駛來井仔跤，即時厝拆、榕仔挖掉，幾工仔就

夷為平地矣。這馬古厝佮榕仔煞同齊舞光光，變做一片空地，

用空心磚圍咧，看著誠奇怪，足未慣勢的，好佳哉！井猶佇咧！

毋過 ， 予人感覺加足稀微的......。