念扣仔．．採集 

1.一日食飽走西東，拄著老某撲老翁；翁撲某，某撲翁，兩個相撲揪頭鬃，厝邊隔壁倚來問，恁兩個為著啥麼空，踮佇遮相撲揪頭鬃。伊就講，老同姒，你毋知，這是為著舊年的五六月，後尾一個歹火籠，我共提去囥，伊擱偏偏提出來烘，才會踮佇遮，相撲揪頭鬃。 我共講，老同姒，人咧講，翁仔某共食共睏，嘛是千年的福份。你著翁疼某、某疼翁，才會冬冬好，好冬冬。

2.小囡仔生來真激猴，手夯一枝痞斧頭，肩頭一枝尖擔頭，我著嗆嗆行嗆嗆走！走到深山頭，相思頭、雞柔頭、菝仔頭、九芎仔頭，縛縛捆捆做二頭，我著嗆嗆行嗆嗆走！走到街仔頭，入去菜市仔頭，行到豬砧頭，拄著一個殺豬仔頭，送我一粒漚豬頭、鵝頭、鴨頭、死雞仔頭，縛縛做一頭，共我吊佇尖擔頭，我著嗆嗆行嗆嗆走！走到阮兜的門跤口，看著阮兜的痞某猴碰門扇頭，咒罵我嫁著散翁袂出頭，雙港目屎像雨水滴滴流。我勸伊，毋免哮，好人一工會出頭，伊罵我，毋成猴，死老頭仔啊死老頭。

3.老身食甲九十九，面皮攝攝做一溝，胡螓歇落毋知走，予恁祖媽夾一下吐腸頭啊吐腸頭。

說明：念扣（kho）仔，布袋戲，歌仔戲攏稱呼做扣仔板。是醜角三花出場的台詞，（三花，嘛有稱呼做文醜，常常扮演花花公子的角色。丑仔是布袋戲的甘草人物），是一口氣用相當長的台詞念出來，用扣仔或者撲板來伴奏，增加伊節奏感，內容笑詼閣有押韻，速度愈講愈緊，到忽然間煞，真紲撲閣真鬥搭，目的是欲予觀眾歡喜，感覺趣味。