參加奠禮了後的回想 

下晡參加過身同事庄跤的奠禮，電子琴參西樂團咧伴奏，女歌手唱著台語歌詩「心酸酸」，使人心酸強欲碎去。奠禮按照固定的規律進行，不三時仔插雜著鬥跤手的人大大聲的講話，我目頭結結，印象中佇室外舉行的奠禮大多數是亂操操。

佳哉時間是下晝四點，天氣已經較無赫熱，若無呢，紅日赤日頭布篷跤是若烘爐。一直有一個感想，奠禮搭布篷較按怎佈置就是未莊嚴，世俗的儀式嘛看真未合意。

每改去參加公奠，上香、獻花、獻果、行鞠躬禮，免一分鐘，一群人挨挨陣陣去，連鞭人走甲空空空，感覺是咧應酬。

因為學佛閣學著臨終關懷的因緣，才幫贊蓮友的喪儀，我是揀對象，無想欲搶專業葬儀的生利，而且無收紅包，純然為了關心，予在生的家屬佮亡者攏得著平安。

插幾何年，嘛未愛插矣！真真是好朋友，一年才插一半擺。一方面是發覺喪家的心態無夠虔誠參用心，一方面葬儀社愈來愈進步，一手包辦，免予家屬操勞。

    我對喪儀無想欲插，是有幾項代誌的刺激，回想這的代誌，激一下仔頭腦，較未予無頭神去（老人癡呆症我毋甘按呢講，我攏講無頭神）。

    家屬誠心無夠，欲聽別人的，毋接收我特別的交代。像我足堅持家奠（家奠不比早暗捧飯佮做七，最後一頓送別，愛僎較豐沛咧）的六項敬菜，未使用細個食飯碗貯，愛用大盤仔貯，才成敬意，而且敬菜一定愛煮予燒燒閣調味芳芳。看真濟是拄對冰箱提出來的，冷吱吱，有的閣是鮮（chenn 生）的，換做欲請汝，汝敢欲食？

    奠禮，上重要是意義是追思、祝福。開一、二十萬的式場，主家歡喜車夯（舖張）我會尊重，毋過若無奠文、無生平紹介的追思讚頌，我絕對毋肯擔任奠禮司儀。定定愛家屬寫奠文、寫生平，真濟人攏寫無路來，局不局（不得不）我就去訪問家屬，想欲幫怹寫，真濟家屬六亦閣講無路來，真真是氣死人！有一擺真感嘆，想著一個人別世，家屬煞講未出來伊的好，講無伊某一層做人做事的好，決心家己生平寫予好，免得我的奠禮人講甲無形我或者講甲離離落落！

    插喪禮，起初誠愛請埔里的國樂，認為真有夠水準，尢其是伊會演奏真濟佛曲，毋拘費用真濟，予喪家加了一筆大開銷，想想咧嘛無妥當。閣看人的奠禮，奏的樂曲真濟是未合意，想講敢未使先選便家己奠禮欲放的音樂，我就認真選了幾首ＣＤ的樂曲編集做一塊，我是按呢編排：序曲用寒山僧蹤，孝眷拜奠上香、獻花、獻果、獻食的時用「香華獻供」，讀祭文致哀章的時用「黃昏的故鄉（挨絃仔）」、「望你早歸」，親戚拜奠用「彌陀讚」，故人行誼及追思用「搖囝歌（雲門舞集彼塊）」、「雨夜花」或「楓橋夜泊」，來賓拈香用「送別」、「憶兒時」或「阿彌陀佛佛號」，後來嘛提來別人的奠禮使用過，干礁請人來放音響，效果經濟閣實惠。++