透路理直 

透的意思濟濟真精彩，今仔日就來開講講看覓。

暗頓減一口，活到九十九，大腸透尾口（直腸子）。話若是講透機（透徹），目屎抔（pue2撥）未離。光陰親像風送箭，透晡屬於規半日，透日是規日，透冬是規年。學好著三年，學歹一對時。一年透冬是一年搭搭。一透是一擺、一改。五更透早、透早五六、透早透要攏是咧講七早八早。透暝透日是講一暝到天光，透世人是指一世人。 

直人講直話，食飽講猶未。話欲講，講透流（說清楚講明白）。有話明唱，愛透徹（講話有條理）。有人造塔，著造到透尾。魚仔欲煎，毋通煎無透。翁生某旦，目睭牽電線，食飽好相看，欲做夫妻白頭偕老愛透流（始終如一）。透風落雨，溪流水透（水流淘湧），風透水透（風強雨驟），透流青狂湧（驚濤駭浪），兩人共心牽予椆，透中晝（冒著中午的太陽），雖然無透畷車（直達車）咧走，總是會雨過天清，坎坷扑透（打通），光明大路攏透矣（道路貫通了）。 

面對人生愛正經，無念耶穌基督嘛著愛讀佛經。因果觀念愛滲（siam3）透（思想、觀念滲入人心）。毋通搰力食閣貧憚做，規工攏想欲佚陶，食好專欲做輕可，血壓蒸（音槍）懸血嘛濁。透身大汗（汗流浹背），透雨淋、透雨做（冒著大雨繼續工作不停），南北二路行透透（走遍大江南北），柴愛剖開才知價值，人愛操落去才知氣力。肯拍拚會出脫（成就），認真著透底（透徹），毋免透人（經由別人、共謀）講條件，自然名聲透京城（名聞遐邇）。 

看汝交陪的是關公劉備，亦是林投竹刺，人就知影汝是啥乜。千萬毋通四書五經讀透透，毋捌黿鼇龜鼊灶（書呆子）。做透仔（小密探），或者交陪不三不四的人扑通透（勾結），咧走透（奔走），泉空透水窟（互通聲氣），蛇孔透老鼠仔岫（物以類聚），臭柑透籠（一粒老鼠屎壞了一鍋粥），－生烏有（付之流水），名聲透屎（惡名昭彰）！