契兄毋是物

媒體或者電視台定定使用著「討客兄」即個語詞，「客兄」是指有翁婿的女性，婚外情的對象（某甫），將有翁的女性走鬮（外遇）的行為稱呼做「討客兄」。嘛有將女性做伙鬥陣的情伴稱呼做「客兄」，是按怎卜用「客」兄即字「客」咧？

有人講：清朝治台，嚴格禁止大陸人來台移民，著算有，也愛嚴厲的限制，其中一項就是干礁（只有）某甫人會使孤單身來台，未用得帶家眷，而且早期來台開墾的人大多數是唯福建過來的客人，因此整個台灣性別比例精差傷過濟，風化場所鬧熱滾滾，服務的攏是客人以外的女子，所接的人客兄專是客籍，所以拄著人客來，怹就講愛去「討客兄」！

亦有人講是：是閩南的所在，客人移民入來，閩南查某人參客家籍的查甫人談情說愛、鬥陣相好，夆供體（諷刺）講「討客兄」！

嘛有專家講：「客」字其實是誤用、錯用，正字應當作「契」，伊的來源是「契約」的契，「契兄」原意是「契約頂面合股的人」，後來才轉變做參人發生無正當男女關係的查甫人。

為著避免族群間的誤會，我未愛咧講有翁的查某人有婚外情時，用「討客兄」。毋管「討契兄」也好，「討客兄」也好，即個詞是足歹聽，十足鄙相〈鄙視〉的味，真不雅。台語共意思的有「討查甫」、「偷食臊」，我是卡贊成「偷食臊」。

也有專家對「契」稽考講：「契，是古早閩南所在一種查甫人同性戀的儀式，後來轉變做查某勾搭情夫的代名詞。古早大陸東南沿海一帶，佇海上通商行船的人真濟，遮的人長期間佇海頂生活，相信女性無清氣相，所以查某人未當上船，無咧，船就會出代誌。因此遮的船員佇船頂只好互相用同性戀的行為，做為生理上發洩的對象，久來就發展出感情上的佔有佮依賴，毋過即種行為卻是傳統社會未當接受的，嘛無可能有啥乜規律通約束，只有透過「契」的儀式，來表明彼此建立的關係。明朝沈德符所寫的《敝帚齋餘談》中就有提起：「閩人酷重男色，無論貴賤，各以其類相結，長者為『契兄』，少者為『契弟』………。」所以，「契兄」閣是查甫人同性戀的對象。

「討契兄」，今馬的時行（流行）華語叫做「劈腿」，翻做台語叫「拆腿」，聽起來實在真巧妙，真有創意。共想一下真，拆腿的瑜珈高難度的動作，煞有人毋驚拆腿的酸疼難當，誠興趣，叫是艷福不淺，吸引力十足，雙跤踏雙船，心頭亂紛紛，一失覺察，噗通，落水無淹死嘛狼狽喝娘嬭，！

按呢「契兄」逐家攏知影嘍，閣來講「契兄公」，啥！啥是契兄公汝毋知？汝攏拜過汝閣會毋知？唉！講予汝捌喙鬚好扑結，來！講古予汝聽！

古早古早有一個書生叫郭華，一工伊去參加秀才的考試。路過蘇州，蹛佇客棧，暗頭仔出去買葵扇的時，煞參賣葵扇的姑娘一見鍾情，彼暗兩人就椆柴熱火做了愛做的空課，毋知是郭華暢一下囝傷過歡喜，煞心包油（心肌梗塞）一命嗚呼哀哉，死佇美人的懷中。賣葵扇的姑娘可憐郭華的慘死，閣驚予親情朋友厝邊知影，就將伊的屍體埋踮眠床跤。後來即個賣葵扇的姑娘竟然有身，十個月了後生了一子。為了安搭郭華的靈魂，伊經常地用酒菜佇眠床邊燒香祭拜。有人問伊為啥乜愛按呢。伊就解說講拜床母會保護囡仔頭殼碇爻大漢（頭兒壯壯快快長大）。從此以後，有樣學樣，有人就佇逐年舊曆七月初七即工，就是郭華的忌日彼工，認真學著賣葵扇姑娘的方法去拜床母。賣葵扇的姑娘拜的是情夫，就是咱咧講的「契兄」，所以拜床母其實就是拜「契兄公」。有此一說，汝想咧？　　

好！來講參契兄相關的俗語：「無雄國家未強，驚驚毋通討契兄」，意思是「驚驚未著等」，講甲實在真笑科。「契兄公卡聖三界公」，是講人「自甘墮落」或者「擇惡固執」，哈哈，有夠鬥搭（相稱）！「戲無情，賊無義，契兄無志氣」勸人愛認清交陪的對象。「偷食未瞞得喙齒，討契兄未瞞得鄉里」，勸人愛大端，若無咧，會身敗名裂。「恬稚恬稚，討契兄唯是」是形容「人不可貌相」。「枵鬼契兄食食叫，未曾落鼎就喝燒」是笑體人傷急性、緊逼逼。

紲咧閣來講謎猜：有一題謎猜真趣味：「翁婿出外，查某人討契兄，囥四項果子通知契兄，臆四項果子」？答案是「紅柿、棗、李、梨」，按怎講？翁去做汝來！

早期台灣民間七字仔歌謠，內底嘛有講著「契兄」：

    割菜好食空腹內，稻仔大肚驚風颱，

    契兄不比親翁婿，桶枋未做神主牌。 

        烏龜食老會做公，契兄歸尾會絕亡，
        爛塗性地毋是戇，故意予人去展紅。

閣有一首正港是描寫討客兄的心態：

        玉蘭含笑正當時，親醒郎君人歡喜，

　　　　恨阮親夫毋早去，予阮無心做針黹。

       註..親醒： 親切伶俐。

    落尾，講一個參「契兄」有關係的笑科古予逐家聽，汝若聽了包恁笑甲厝鳥仔飛了了。   

    古早以前有一個歕鼓吹的青盲人，有一工有人厝裡有喪事請伊去歕鼓吹

，怹某就佮情夫偷偷佇厝內約會做散氣（親熱），當進行甲真精彩的時陣，怹翁煞因為喪家奠禮改期，提早轉來。即聲悽慘嘍，契兄是驚一下強卜破膽

，跤手肉疲疲掣，勼覕踮壁邊毋敢振動出聲。   

    即時陣，歕鼓吹怹某心內隨想起一個計策，就對怹翁講：「啊！汝免共我騙，攏講遐的五四三的，啥乜是喪家延期，一定是汝久無歕鼓吹，歕未出聲，去夆戽轉來！」

    怹翁聽著氣甲跳跤頓蹄（氣急敗壞），一直講毋是按呢生（不是這樣子），怹某就講：「無，汝就歕予怹祖媽聽看覓！」怹翁誠實提起鼓吹大聲歕，歕甲誠好聽，彼個契兄就佇優美的鼓吹聲當中，大大方方行出去！即個故事傳出來了後，人就共伊號題名叫做：「歕鼓吹送契兄」。