字體:小 中 大 | |
|
|
2006/02/01 11:21:35瀏覽465|回應2|推薦7 | |
過年包紅包 今年收著細漢囝一包紅包,厚厚仔。我干礁﹝只有﹞收紅袋仔,我講汝亦未娶,愛儉。 細漢囝空課卡穩定,個性平和,卡聽話,對阮翁仔某是無話無句,食頭路出外若人扑毋見﹝遺失﹞,無一通仔電話。29嘍,煩惱伊年歲濟﹝多﹞才娶,父老囝幼卜按怎?我公務員所粒積﹝積蓄﹞才一寡爾,卜﹝要﹞予﹝給,音雨﹞伊佇台北買一間厝嘛無可能。伊閣無想卜轉來故鄉。做人老父未當予囝買一間仔厝娶某成家,嘛真自嘆! 大漢囝彼包紅包,薄薄仔,我有共收。伊空課換來換去,十做攏無成,挖一寡錢出去。對頭路頭家是嫌東嫌西,未趁閣想卜開,未蓋聽話,同學是王兄柳弟﹝阿貓阿狗﹞,食薰閣會飲燒酒,轉來厝當做旅舍干礁睏,上煩惱就是伊! 厝內是牽手掌權,每年是伊包紅包予我,今年我有先共銀行領錢用,予我的紅包我轉送予伊,感謝伊辛辛苦苦咧持家。 遺憾的是,當我知影有孝,有能力通有孝,父母攏無佇﹝在﹞咧,過年卜包紅包予怹老大人嘛無機會!尤其想著阿母,當我的囝出世無真久,伊道別世,一世人食盡苦楚,身體孱閣有病,無享著福。 每逢佳節倍思親,想起阿爸阿母,目屎強卜滴胸前!
|
|
( 創作|散文 ) |