土地的囝兒　　　         

        聽陳玉峰教授的演講，伊講著「土地的囝兒」兩个日本人的故事。

「日據時代阿里山林場主任伊藤猛，所蹛的是今馬阿里山工作站對面的宿舍，彼个日本宿舍已經變成網球場啊，宿舍的對面伊親手栽了一欉日本黑松，是毋是欲借著這欉樹仔來安慰思鄉不忘本的情懷，咱毋敢確定。伊的查某囝就是佇遐出世，吸收著阿里山這片土地的精華。

終戰了後．伊藤查某囝參濟濟的日本人共款，被遣送轉去日本，當時伊干礁十幾歲仔爾爾，毋過確定的是，伊是具有阿里山永久記持的『日本人』。轉去日本了後，伊按怎『思鄉』咱無法度猜想。

一九九七年八月間，伊倒佇病床賰一屑仔喟絲仔，厝裡的人問伊閣有啥乜心事，伊講欲啉一喙台灣阿里山的水，佇厝裡的人為難當中伊來別世。遵照伊的遺言，伊藤的孫仔扎著伊的骨灰來到阿里山，辛苦走揣結果，按照老母的交代，將骨灰埋店深深的彼欉黑松樹跤，同時嘛帶轉去一罐阿里山的泉水，沃佇伊日本的墓裡。」

咱毋知影這位平凡的「日本人」，是毋是會使講是標準的「台灣人」，咱無法度去體會伊藤查某囝的心境。日本是伊的祖國，毋過台灣敢毋是伊「日思夜夢的故鄉」？台灣敢毋是伊的根咧！

「事實上阿里山慈雲寺邊仔，拋荒的塗堆，懸拄天大摸大欉的juniper(檜木)下面，埋著未少日本人的骨骸，無論有墓牌無墓牌，真濟年來攏有殷的後代或者親情朋友來遮走揣、祭拜，毋過真少有人將日本人的骨骸送轉日本。」

陳教授閣提起另外一个故事：「一九九七年新聞報導日據時代第七任總督明石元二郎的木棺出土，伊的孫仔元紹來到台灣，尊重伊阿公的遺願，另外揣一个所在將阿公的骨骸埋店台灣的土地。一个軍國政權文化，頂對總督，下至百姓，真真正正攏是有這種落葉歸根的土地倫理佮認同情操………。」

世界上各國國籍法大多數攏以出生地做伊的國籍地。干礁台灣出一寡不肖的人毋認同台灣，吃碗內看碗外，乞食趕廟公，損蕩蹍踏咱台灣，殷敢是台灣的「外國人」？徛店這塊土地，著愛好好愛惜這塊土地，愛惜這塊土地的人、物件、山河，關心這塊土地的事誌。

註：這個故事部份文字，參考陳玉峰教授「土地的兒女」彼篇文章翻譯，並且得到陳教授的同意引用。