出租的厝煞夆賣去

　　媒體報導有一人厝稅人，厝煞夆（給人家）賣去變別人的，討嘛討未轉來，氣著卜請求國家賠償。

　　代誌（事情）是按呢發生？厝主的戶籍佮實在蹛（住）的所在無仝（不同），伊的戶籍設佇早前蹛的厝，厝空空無采就稅（租）人加趁寡收入，歸十年來攏無問題，啥知會出意外，600萬價值的透天厝，煞無張無持（無緣無故），無聲無說，400萬就予法院賣掉，賣了3、4月曰，去巡厝才知影厝已經是別人的，實在是氣加強卜掠狂，真是氣死人！

有一个（個）人來租厝，厝稅約定繳進前，半年一繳。是按怎歹徒知影厝主戶籍設佇遮，人無蹛遮？我想即種代誌真簡單就有法度探聽。嘛真有可能是有批件寄來，厝主久久來提，講話中間無意中洩漏去，予人有機會來做案。

　　厝是按怎夆拍賣去？應當是歹徒共謀的，怹（他們）先偷刻厝主的印仔，閣偽造厝主開的本票，本票所寫的住址是戶籍地。由某一个人向法院聲請本票強制執行裁定，法院照住址寄裁定，厝跤用偷刻的印仔收件。後來人閣去聲請法院查封執行，有附著厝主的戶籍謄本，法院依照戶籍的住址通知厝主，收件的回文嘛有厝主頓的印，法院認定拍賣程序攏有符合，結局厝就予人買去，拍賣的錢路尾予人領去。法院點交厝進前先勘查，厝跤已經搬徙位，厝內底空空就隨交予買主，買主整理了才搬入來蹛無偌久，厝主來巡才知即聲死嘍！

　　伊毋知那會變按呢，氣大大去揣法院理論，法院將卷宗反（翻開）起來予看，厝主面攏黑去，差一點仔腦充血昏倒，搖頭嘆氣，話講未出。

　　做案的手法，神不知鬼不覺，事後一查，厝是合法拍賣，厝是善意的第三者買的，嘛過戶了仔，厝是絕對討未轉來。即層用偽造文書做手段的詐騙案，事後一查，拍賣的人是人頭，厝跤是用假證件冒名冒姓來租的。卜追究干礁（只有）人頭食罪，其他嘛揣未著人，卜討賠償我看是「火燒罟寮－無望（無網）」。