我只喜歡黃生由橫版龍虎門時期至白蓮教時期內佢嘅所有作品，也包括咗初期嘅如來神掌同醉拳在內，我認為這段時期係佢嘅顛峯！
黄玉郎嘅公仔，人體比例同公仔嘅身體動作、變化同運用，係全行至高，無人能及。所以佢畫武打動作漫畫就係至強，招式至靈活、動感至强至正！所以佢這段時期嘅作品就係我收藏嘅目標。
而係橫版公仔書嘅年代，大量書種都係出得幾期就無故失踪或摺埋，可以出到幾十期書嘅，真係屈指可數，龍虎門新傳就係其中之一啦。龍虎門新傳唔係全部出自黃玉郎手筆，期後都係由張萬有接手，但係唔詳細分啦，我都將這套書歸納為黃玉郎，全因為佢個名、佢個"龍虎門"招牌，龍虎門新傳才得以畫到幾十期。

龍虎門新傳全套1-46期完

好多封面都好正，反而比正牌龍虎門封面更少見，值得欣賞！

整套"新傳"係衆橫版書之中唔算難揾，但係現在要齊一套又唔係咁易，而且一本都唔平咯。想睇返最簡單係買套"新傳"合訂本咯，全套8本。