「哈！是一隻迹爾嫷的鹿仔！」有人佇陷阱頂懸大聲喝，鹿仔母舉頭一看，有一个扑獵的人拄佇咧探頭看落來。

即咧時陣，雄雄聽著一聲「唰．．．」鹿仔母夆吊起來塗跤頂懸，扑獵的人唯褲頭抽出來一支金熠熠的獵刀，準備欲隨共鹿仔母刣死。

鹿仔母流著目屎，延路磕頭、延路哀求講：「尊貴仁慈的大人啊，我干礁是一隻動物，予汝掠著，我家己知影是走袂去，一定愛死，我毋敢求汝饒命，干礁要求汝同情我的厝內面，擱有兩个囡仔等我飼怹，怹擱誠細漢，連東西南北都分袂清楚，求汝暫且放我轉去，予我敎怹安怎揣水草仔來食、教怹安怎獨立求生存，明仔再中晝進前，我一定轉來領死。」

扑獵的人聽著一隻鹿仔竟然會曉講人話，心肝頭驚一趒、又擱誠歡喜想講：「哈，是一隻會曉講人話的鹿仔，我若共伊獻互國王，一定會得著一筆大大獎賞的財富，一定會當變做好額人，我慢且共伊刣死。」

　扑獵的人心內安呢想、喙應鹿仔講：「汝的要求未免傷過分嘍，汝想看覓咧，連阮人類都會背信忘義矣，無講汝只是一隻鹿仔爾爾？汝掠準我是憨大呆，會相信汝講的話，道安呢放汝走哦？」

鹿仔母著急甲強欲哭講：「尊貴仁慈的大人啊，汝就手梳舉懸，放我轉去一擺，天公伯仔會保庇汝，因為，準講汝若放我轉去，安呢著干礁我一个命無去爾，毋拘，汝若毋肯放我轉去，安呢道親像刣了阮母仔囝三个啊！」

迄个扑獵的人是一个粗魯人，自來道誠愛殺生，即陣，伊想著前幾工仔，伊的家後拄則替伊生一个古錐囡仔的時，伊心肝有一絲絲仔軟落。毋拘，伊心念則安呢想，隨擱講：「袂使得，我等幾落工矣，則等得汝即隻鹿仔，準講我共汝放轉去，毋是白了我的工啊？擱再講，為著欲求生存來騙詐佬（ㄌㄠˋ），本來道是阮人類定定變的把戲，連人類攏袂當信任啊，汝叫我欲安怎來相信汝一隻鹿仔咧？」

鹿仔母誠傷心講：「尊貴仁慈的大人啊！古早人講『救人一命，勝過造七級寶塔。』準講汝放我轉去一暗，道假若救活了我兩个無辜的囡仔，汝的功德，是偌爾仔偉大啊！擱再講，我雖然干礁是一隻動物，毋拘我毋捌講過白賊話，即馬，我道對天咀咒，準講汝肯放我走，我若無遵照約束轉來領死，安呢，我甘願墮落十八層烏暗的地獄，承受生生世世袂了袂盡的痛苦！」

扑獵的人聽了，吐一个大氣講：「唉！我想，汝應該是會比人類較老實一寡吧？好啦，我道暫且相信汝一擺，放汝轉去一暗，毋拘，若是汝明仔再中晝進前亦無轉來，安咧，後擺道莫怪我下手無情哦！」

鹿仔母流著目屎，一擺擱一擺共扑獵的人磕頭說多謝，唯樹林走轉去。