有一日這隻貓仔囝淪入去車內底エンジン(引擎)遐。拜託車行來處理，頭家講伊捌替人掠過貓，毋拘尾矣去予咬一下，著去注射。了後伊就無欲咧kâng處理矣。
　
尾矣拜託消防隊來，貓已經毋知走對佗去矣。
分隊長交待講，貓欲飼就掠入去內底飼，若無這種情形會定定發生。

足想欲共飼落來，毋拘往過飼貓的經驗，予我知影，飼貓對我來講，會愈來愈困難。因為貓是脆弱的小動物，怹嘛需要醫療，我若老甲無才調掠伊出去hông看，敢毋是誠費氣？

彼个拜六透早當著這隻貓。載伊去動物病院。彼是一間有咧收留、送養的動物病院。以早飼貓的時，捌掠貓去注預防射佮看病。老頭家己經過身矣，少年頭家無定定佇店裡，出來接貓的是老頭家娘。我共伊講貓仔籠我另工才來提。

第2禮拜的拜六下晡，下課了順路去欲提籠仔。順紲去看貓。
少年頭家共我講：妳都知，這隻色水生做較暗，人來看貓的，看的攏是彼幾隻色水較媠的….，這隻較無得人疼。看欲閣掠倒轉去飼否？
　
我捾著空空的貓仔籠轉來，一路想彼隻貓仔予媽媽pàng-sat，閣予人嫌伊生做無夠影目，內心像貓仔籠按呢空空空。

彼暝用私訊hām囡仔參詳。想欲共彼隻貓掠轉來飼，毋拘驚仔我愈來愈老，貓咪嘛會老，有一工我若無才調飼的時，予你接手敢好？
囡仔本成就有飼一隻，考慮了，共我講：ＯＫ

第2工我想欲共掠轉來。頭家煞共我講：妳欲飼？閣轉去考慮幾一下。
無欲予我掠轉來。
　
經過幾何工，我去共伊講我考慮好矣，真正想欲飼。
伊講這隻貓真［親人］，這陣貓，都干但這隻會共sai-nai，手若倚，就走來參伊耍。伊講伊決定欲留落來家己飼。叫我若欲飼撿別隻。

後來我閣去幾何擺，攏無拄著頭家，老頭家娘一直我共講歹勢，怹囝都合意這隻，袂當予我。
　
這馬這隻貓飼佇怹店口的籠仔底。
籠仔內底有四、五隻貓。
我若叫：貓～
這隻貓就會越頭看我。去看幾何擺攏按呢。我相信伊會認得我的聲。因為我載伊去彼畷路，伊貓貓叫，我一路安慰伊，叫伊：貓～

攏講貓的記持無好，我毋信！
已經掠去個外月矣。
昨昏閣去看，聽著我的聲，佇一陣跳懸跳低的貓仔群內底，伊恬恬坐落參我相相，時間經過幾何分鐘，伊的姿勢不變。彼兩蕊目睭，若像咧共我講：我會記得妳。嘛若像咧共我講，佇遮真好！

愛妳袂著，祝妳幸福，就是這款心情？

想想咧，咱當初想欲共掠轉來飼，是因為頭家講這隻較無人緣，毋甘才觸動閣飼貓的心。今伊有人疼、有人惜，我著替伊歡喜才著！

揣食=覓食
tshuā=帶
當著=誘捕
pàng-sat=拋棄
影目=醒目
Hām=和
sai-nai=撒嬌
相相=相視