哥哥讀初中的時，假日抑是放學轉來厝裡，冊揹仔囥咧，著去田裡鬥做穡。伊欲去台北彼陣仔是熱人，皮膚烏烏，跤肚仁結實結實，體材勇壯勇壯，是一个標準做田的庄跤囡仔。
　
會記得彼个過年前的尾暗仔，阮目睭猶一直對許厝崎仔斡角彼搭金金相，等待腦海中彼个田庄少年家的身影。
　
閘門跤行入來一个瘦瘦、懸懸，皮膚白白，穿一軀新衫的生份人。
聽著邊仔有人叫一聲：哥哥！我猶毋知影，原來彼个生份人是我的哥哥。
　
看著哥哥，我並無預料中歡喜，顛倒有一種［我的哥哥紡見去矣］失落的心情。

一个勇壯勇壯的哥哥，去台北半年，換一人白肉、sán-thio-sán-thio的生份人，誠bē-hô！

其實變做都市人的哥哥，並無改變伊疼我的心。欲去做兵的時，擔心我的鐵鞋若歹去，驚仔厝裡無錢通替我做，就佇伊做兵進前，共廠商訂一雙鐵鞋予我備用。鐵鞋足貴的，伊一定檢足久。

雖然按呢
一直到這馬，我猶是定定想起，暗時仔阮已經咧睏，伊猶咧讀冊，厝裡彼隻貓咪，ku佇哥哥跤邊溫燒，彼个溫暖的記持。

這仙尪仔，敢有咧等伊的哥哥？！

**
sán-thio=高瘦（字典寫sán-thiu。阮是講sán-thio）
bē-hô=不划算