網路城邦
上一篇 回創作列表 下一篇  字體:
手機仔店
2018/09/12 15:53:17瀏覽372|回應0|推薦15

2018.09.02
總算等著一个無落雨閣無活動的歇睏日。
囡仔一直咧叮嚀,新手機仔著開來用,若有問題較好參人講。
早起提去市區上大間的台x大,門頂頭寫11:30才有開店。閣遮早,欲閣轉來厝裡嫌費氣,就去大賣場踅一睏,閣去手染店看衫,看合意幾何領洋裝,買兩領爾錢就開甲焦焦,佳哉錢紮無濟,予我免開過頭。
 
台x大鎮北店總算開門。
服務人員一面替我共舊資料徙去新的機仔,一面閣咧處理客戶買手機仔,叫我先起來,位先予新人客簽名,我起落無方便,問伊敢著閣偌久,我徛咧就好莫閣坐落去,伊講資料咧盤較慢,著閣等。一向敢毋是一對一的服務,呔會叫我徙來徙去?我想無!
 
伊共人客收錢了後,才閣倒轉來處理我的。煞共我講:妳這台手機仔無法度連WiFi,速度閣真慢,是有問題的機仔,叫我看佇佗位買的,提轉去予怹修理。
哪會按呢?恁無法度處理嗎?應講毋是遮買的,無法度!

這時陣已經倚1點!
 
轉來厝,想講囡仔下埔的確有班,莫吵伊。就揣出來伊頂改轉來提予我彼張名片,敲電話去台北手機仔店。
店員講:手機仔欲賣出去的時,攏有試過,連接WiFi應該袂有問題,建議我是毋是去揣第二間處理看咧?若真正有問題,才送修!
 
台x大鎮北店是附近上大間的,敢有閣比怹較gâu的?
想著欲寄手機仔去台北誠費氣,不如先聽伊的建議。
下埔去民生南路台X大的店。
欲去的路裡想講,唉!欲送我物件,都打現金就好矣!
若予我順利處理完滿,一定欲去義美買冰來食!
 
工作人員看我的手機仔講:「遮新,無啥可能有問題。我看一下!」
看伊舊的點開、新的點開…無hâu-siâu(華語講『不誇張』)都無五分鐘,伊講:無問題啊!
 
想袂夠一張細細間,才兩个員工的店,就共我煩惱甲中晝食袂落飯的問題解決矣!
行出來手機仔店,斡去附近義美買冰。順紲買兩份請手機仔店的,『帥哥佮正妹』。

這種冰我真愛食,心情好的時,會想欲食一塊;心情䆀的時,嘛想欲食一塊矣!

( 心情隨筆心靈 )
回應 推薦文章 列印 加入我的文摘
上一篇 回創作列表 下一篇

引用
引用網址:https://classic-blog.udn.com/article/trackback.jsp?uid=sann&aid=115683648