網路城邦
上一篇 回創作列表 下一篇  字體:
讓人
2018/09/12 15:46:46瀏覽220|回應0|推薦8

2018.08.30

這台超過10萬kiro(公里)的戰車,烏油的紅燈已經to̍h足久矣。
最近逐工下班時間攏落雨,無方便去換烏油。愈騎愈袂放心,無去機車行走一畷,驚仔會顧路。
 
車騎入去機車行,無看著平時仔咧做工課的師傅,干但頭家咧估一台事故車的修理費用。
等伊估好,問伊呔無看著師傅?講是去台南上課。在職進修?毋是,是上環保的課。
這間機車行足重視環保問題,一般機車行咧修理車的時,會用風共車頂頭的塗沙粉仔tsuānn掉,伊是用吸的。修理場所頂頭的燈火是光亮的,無牢ing-ia(灰塵)。
 
我騎的戰車邊仔有輔助輪,欲換機油著愛拆輪仔,較費時間,我就坐落來等。
頭家提家私頭仔拄欲拆爾,一个阿桑騎入來講嘛欲換烏油,我想講換伊的免拆輪仔會較緊,就共頭家講先換伊的,我等一下無要緊。
 
安全帽仔拔落來的阿桑,白白白的頭鬃,行倚來共我講多謝,順紲坐落去講:「唉!袂堪得徛矣!」
彼那以早,我無法度體會[袂堪得徛]這句話的感覺,今,我知矣!
我共伊講我嘛是。
 
參阿桑哪等哪開講,伊講伊同事的囡仔,嘛是像我按呢袂行,伊講:恁攏真勇敢!
 
從古早,勇敢兩字用佇我身上,我攏感覺怪怪。
我咧想,勇敢應該是按呢解講:明知影這層代誌是困難、危險的,我猶肯去做,去面對,按呢才是勇敢敢毋是?跤袂行這層一世人困難的代誌,是天公伯仔拍派的,ah無問我肯不肯,推辭攏袂掉,毋是我家已去認注的哦,所以佮勇敢無關係!
 
頭家哪換烏油哪巡阿桑彼台車,我看伊頭前輪磨甲誠平,這種澹濕濕的天氣,騎著危險。
果然頭家共伊講愛換輪矣。連過瀘的嘛愛換。阿桑講按呢伊錢毋知紮有夠否?我是咧煩惱,舞甲來我暗頓敢閣有人咧賣?
 
大通路車來來去去,塗跤雨水一滴綴一滴一直落落來。車聲人聲吵鬧中的雨景,有淡薄仔平靜的感覺,若細漢時落雨天,恬恬坐佇護龍看雨水滴佇岑簷前的情景。

聽阿桑佮頭家咧會怹攏會記得的87水災。
我對古早87水災的記持,是聽阿爸講的,阿爸講,連紲兩三工烏khàm-khàm的天,咧激雨,日時像暗時彼暗,雨一來,溪水對頂頭沖落來的速度,有人走閃袂赴,有人佇厝頂覕幾何工,誠慘!
毋拘彼陣仔做大水,無政府通罵(袂曉欲罵、嘛袂使罵)。做田人干但會當目屎含咧,怨嘆講:天做代!
 
等頭家共阿桑的車完成的時,已經過欲成點鐘矣。一直共我說多謝,多謝我予伊先用!
其實,我是干但欲讓伊先換烏油爾啦!呔會知影伊機車著修理遮濟項。
腹肚枵的我,按呢想!
 
續落去處理我的......免十分鐘就解決。
頭家講:歹勢,予你等遐久!
 
我嘛感覺等真久,毋拘是我家已講欲等的,只是彼个感覺足奇怪........
我是咧創啥?!

( 心情隨筆心靈 )
回應 推薦文章 列印 加入我的文摘
上一篇 回創作列表 下一篇

引用
引用網址:https://classic-blog.udn.com/article/trackback.jsp?uid=sann&aid=115683572