2018.08.25

因為我比仝沿的較晏入學，同學攏比我較少兩三歲。可能是比人較濟歲，所以國校仔的成績，足少無提第1名。
　
總是靠勢成績好，老師較疼我，不知不覺當中，個性內底有驕傲。
　
一直到國校仔畢業考試進前，我猶是自信滿滿，一定有才調提著一个媠媠媠的成績，每一科100分，六科絕對欲提600分，一點仔都無懷欵。
　
考試單分落來，總分595分。
我上有把握的『國語』予老師扣5分。
因為考試紙頂頭，所有佮心有關係的字，攏予老師拍Ｘ仔。
為什麼？老師講我共心的兩點，攏囥佇內底，毋著！
　
毋拘，我平時仔寫日記，寫功課，攏是按呢寫，老師毋捌共拍Ｘ仔？
　
仝班內底中有一个濟我三、四歲的同學，（小兒麻痺的阮，真濟人較慢入學，所以仝班的濟我三、四歲是正常的）。伊坐輪椅，老師有時仔下課了後，會捒伊去校園踅踅咧。