 
字體：小 中 大 |
|
|
|
| 2018/09/12 14:43:40瀏覽181｜回應0｜推薦3 | |
| 七娘媽生的黃昏，月娘徙到半天懸，誠懷念細漢時的節日。 細漢時的熱天，暗時仔大人會共椅條舉出來門口埕，坐涼兼講古予阮聽。 彼个年代，無光害、無空氣污染，舉頭看著的，是規天密tsiuh-tsiuh(密密麻麻)閃熾的天星。 七娘媽生，大人上捷講的，就是牛郎織女的故事。 有按呢講：牛郎（lông）tshuā囝在兩爿（lióng-pîng），織女tshuā囝在面前。 聽講，牛郎佮織女生四个囡仔，怹分開了後，一个人tshuā兩个囡仔佇身軀邊，牛郎共囡仔囥佇兩爿邊，織女共囡仔tshuā佇面頭前。 當時講古的序大人，會指天頂的牛郎織女星予咱認，牛郎星的兩爿邊仔，有兩粒比伊較細粒的星，織女面前嘛有兩粒細粒星。 這馬想起來，會編這个故事，原來是欲予咱認捌天頂星的位置，古早人編故事，誠有智慧、誠趣味，嘛予咱加記較會牢！ 彼年我佇外家做月內，滿月了後阿母參我轉來，替我鬥tshuā囡仔。 轉來彼日，阿母款油飯拜床母。 拜好，金燒了，伊煞共我講：我看！我若無佇遮的時，妳莫拜床母。 是按怎？ 阿母講，佇房間點香有危險，若無細膩燒起來，我佮阿勳袂行袂走，閣tshuā一个幼嬰仔，啊是莫拜好矣！ 阿母是一个真傳統的女性，對年仔節仔的拜拜，毋捌凊彩。 佇家家戶戶咧拜床母的今仔日。我無咧拜，毋是不敬，是阿娘疼囝的心情，超越所有的形式。 |
|
| ( 心情隨筆｜心靈 ) |
