去菜擔仔買菜，想欲煮『三杯』料理，上重要的就是著愛有九層塔才著味。問阿桑敢有九層塔，伊講即馬誠貴，伊去批菜的時嘛買無。

我講按呢煮起來就無成『三杯』矣

伊足正經共我講：汝轉去慢慢仔騎齁。

我叫是伊教我慢慢仔騎看別擔有咧賣否

伊繼續講：彼路邊有人種，汝就共伊挽寡- -仔！

我講我毋，若去予人翕相，講這个跛跤的煞做賊。

伊講袂啦！

我抑是甘願減一味！

三杯料理，是我欲嫁進前頭一項學煮的菜。

彼陣仔阮伊呀煮三頓的時，叫我徛邊仔看，學煮。

看無幾遍，我就講，簡單啦，都共鼎烘予焦，下油予熱，物件下落去，等一下，就會食得矣。

太是遐簡單？

有一日親身落去煮，共伊呀講欲學煮［三杯雞］。

伊呀料款款咧，連配料比例攏替我攢好勢，我干但是照食譜一項仔一項落鼎，炒熟，試食看咧….夭壽，tēng-khok-khok。（硬梆梆）

雖然已經是三十捅年前的彼盤『三杯雞』，我猶會記得彼日拄好去阮兜食飯，我佮阿勳的同學，阮老大的(蔡藥師)，伊ngoeh（怹二林萬合仔的腔..夾）一塊肉起來食，足捧場講：袂歹食！

其實我知影，遐是真歹食！

一路行過- -來，伊總是按呢鼓勵我；無論是頇顢的煮食，抑是毋成樣的台語文。伊攏總呵咾，攏總捧場！

盈暗這鼎差九層塔『三杯雞』煮起來，捧予阿勳試食，講：袂歹食！

我想，這遍的［袂歹食］，離好食無偌遠。予我有勇氣；明仔載共這鼎，捧來去合唱班歲未聚餐展寶一下！