坐地排球

2017.07.09

［坐地排球］是啥物碗糕？
去維基查，原來佇我iáu未出世，這種運動tō已經存在矣。
　
阮協會坐地排球已經拍兩、三年矣，我毋捌想欲落去耍，因為感覺著足用氣力，我敢會堪得？
　
最近協會又閣開課，叫我去thap人數；想講，練習場地佇厝附近爾，耍看覓咧！

今仔日頭一遍上課，老師講，排球，是一項誠幼路ê運動，手拍著球的角度，影響球走對佗去？
嗯！若像咧講人生路咧- -我合意！

排球對阮並毋是生份ê名詞。
囡仔高中ê時拍排球，拍甲手筋受傷，tshuā去hông看，醫生講上無一年、半年袂使閣bak球....無偌久伊就閣佇學校球場出現矣，咱擋伊袂牢，干但會當毋甘佇心內。
去台北讀冊，怹爸爸交待伊，著認真讀冊，毋通顧拍球。
拄開始聽講是參加系隊，後來看伊四界去拍球；原來伊無報備，恬恬仔參加校隊，毋敢共爸爸講。
怹阿爸講，to毋是戇的閣。系隊哪有可能全國四界去拍？早tō知影伊參加校隊。彼大漢矣，放伊去！
　 
一遍去高雄參加比賽，péng跤刀受傷。
問伊：跤受傷矣，汝無上場拍啦hoⁿ？
有、提一種較ân的繃帶，共受傷的部份縛ân-ân，照常落去拍。
我責怪伊無愛惜家己的身體，敢毋是有預備球員？
伊講，疼忍一下tō過去矣，球員中間默契是長期陪養的，若是因為伊歇睏，輸球，伊會誠袂得過。

囡仔講，tō是因為參加球隊，感覺成績袂使受影響，所以拍球了，攏足認真讀冊。
Taⁿ，伊to也順利畢業咧做頭路矣，我想，少年人的思考方式，毋是阮綴會著的。

早起老師教寡仔基本動作了後，tō分兩隊對拍；我兩遍發球攏牢網仔，失分，有夠歹勢；聽著老師講：比練習ê時加真好哦！隊友嘛安慰講，汝才頭遍耍爾，袂bái矣！
我開始有...想欲贏.. ê感覺矣。

初次拍球轉來，悿甲！
無要緊，歇一下tō好！
歡喜人生行啊行，又閣斡入去一條毋捌行過ê路裡。

閣較歡喜ê是，年歲少年少年ê老師，竟然有才調全程用台語上課！

講台語會死，我真正毋願相信。