 
字體：小 中 大 |
|
|
|
| 2017/12/10 16:41:54瀏覽148｜回應0｜推薦3 | |
|
聽口琴演奏
2017.03.12 未歇睏，就共代誌排滿滿，按算是一个真無閒ê假日。 煞佇拜五暝發燒，規暗無睏，看過醫生，食了藥仔，規个人就若像消風ê雞胿仔，無一點仔氣力；只好取消拜六參羅老師ê約會。 對羅老師較歹勢，若像驚伊來阮兜咧 按怎講？ 因為咧喬地點ê時，我共伊講，若落雨，我就無愛出門哦。 伊講：若落雨，來去恁兜 我應：按呢，無落雨嘛來阮兜 伊問我敢真ê？會使來阮兜？ 我講當然真ê，只是，恁蹛ê是［豪宅］、阮蹛ê是［好窄］，對恁較歹勢。 伊講朋友汰有咧論這？ 我知啦！ 從結婚到今免搬徙，有這間蓋頭厝免吹風淋雨，雖然厝間無豪華，我已經誠滿足矣 我厝對田尾仔搬去台北，了後搬7遍厝才搬到家已ê所在，我蹛仁愛學校，歇寒、歇熱轉去，定定是去無仝的厝，彼種ê漂流感覺，誠無四序！ 阿勳講伊個性較恬，以早國校仔嘛是兩、三年就搬一遍厝，重新認捌朋友，是誠困難ê代誌。 阮ê頭殼內，有對搬厝驚惶ê記持，所以，就珍惜這間料小ê厝間。 羅老師講我想傷濟！朋友無分好額、散，嘛無分大細漢。 我知影，所以毋是無愛予汝來，是驚共感冒uè予汝哦！ 兩工攏按呢！ 食藥仔就想欲睏、睏起來就食藥仔。 今仔日食過中晝頓，倒佇眠床，想講：下晡參朋友約ê口琴音樂會，敢欲去？ 若欲去、恐驚仔是無力通行；若毋去，感覺誠毋甘。 楊老師知影我會曉歕口琴，看著這場演出ê消息，隨講欲買票，招我佮朋友去觀賞，臨時欲叫伊共票予別人，感覺對伊真歹勢。 上落尾決定，共藥仔紮咧，若無爽快極加提早轉來！ 坐佇台跤，聽著茱蒂口琴樂團演奏頭一个音聲，我就知影，藥仔免食矣。 音樂叫醒全身軀愛睏ê細胞，趕走纏我幾何工ê愛睏神。 坐佇我正手爿ê阿美，聽著演奏強欲綴音樂跳起來，頻頻對坐佇我倒手爿ê楊老師講：物超所值！ 阿美講伊嘛佇厝裡倒兩工矣，毋是破病，是心真悿，想袂到聽一場口琴演奏，一个心悿ê阿美佮一个破病ê我，攏活跳起來矣！ 多謝楊老師！ 下一遍，茱蒂口琴樂團若閣來，阮一定閣來聽！怹捌佇國家音樂廳ê演出，遮呢懸的水準，行出來演藝廳，看著彼个門，狹甲輪椅無才調出入，就感覺誠可惜，是按怎這種ê演出，我袂當參坐輪椅ê阿勳來聽？ 文化中心演藝廳ê狹狹ê門，雖然我已經反應有夠濟遍，無法度，假睏ê單位，叫袂精神.... 是講，我嘛是欲閣講：阮毋是欲享受特權，只是想欲得著公平ê對待。 靠腰，厚厚歡喜ê心情，去予彼个［廈門］....透薄去矣 相片，是欲予汝看掛佇胸前彼支古錐ê口琴，今仔日入場送ê哦！ 啊若是相片內底ê我，楊老師講：莫睏啦！目睭peh較大蕊咧！ 哎唷！睏兩工，食藥仔捾水，目睭閣展較大蕊嘛媠無路來啦 ....暗安！
|
|
| ( 心情隨筆｜心靈 ) |
