網路城邦
上一篇 回創作列表 下一篇   字體:
阿爸予我的口琴
2017/12/07 14:03:57瀏覽304|回應0|推薦10

2016.09.16

細漢厝內散食,佳哉阿爸用音樂的環境,予阮苦悶的童年得
著消敨,心靈得著安慰。
阮綴阿爸聽佇彼台外殼佮腹內分離的ラヂヲ【收音機】。精彩的武俠天下、日本演歌佮音樂,當然,閣有阮聽無的日本短波節目,聽有、聽無;攏聽!
聽ラヂヲ幻想出來的世界;真闊。

國校仔4年離開厝裡去外口蹛學舍,無ラヂヲ通聽矣。
下課了等食暗頓的時間,是一工上輕鬆的時陣。同學有的彈吉他、有的歕口琴,嘛有人啥乜樂器攏無,就用歌聲鬥鬧熱,彼時當tshìng的布袋戲歌曲,歕口琴的同學差不多攏會曉,聽著真欣羨。
 
歇睏轉厝裡,講起同學會曉歕口琴的代誌,知影厝裡無liōng-siōng錢通買,毋敢開喙講欲挃。
 
想袂到升5年的時,阿爸竟然買一支口琴予我,有夠歡喜。會記得彼陣仔一支成百箍,有夠我用一學期的[零用錢]彼爾濟。
 
提著口琴了後,我tō參同學學歕口琴。
 
一般咱若學樂器,攏會對1155665..小星星開始學
我學口琴真貪心,一下就學布袋戲內底一首節奏真緊的歌,經過幾何十年,旋律閣會記得..歌詞嘛會記得:「東邊山頂日頭漸紅烏雲飛震動.樹林中鳥隻咧叫弄阿弄叮噹., 阮就是活潑的一般少年人,…..」
歌名....袂記得矣!
 
後來聽阿爸用口琴歕日本曲[荒城之夜],才發覺,原來口琴歕節奏慢速的曲,加一層厚厚的哀怨,是我閣較合意的音聲啊!
 
連假4工,想欲共厝裡散掖掖的冊整理一下。
整理厝內上袂當按算時間,而且有時陣愈整理愈亂。
共成十年無振動過的櫃屜反出來。記持無好矣,櫃屜內底真濟物件攏袂記得是按怎來的、按怎囥落去的。

這支口琴,我會記得。就是阿爸買予我彼支口琴。雖然舊甲變形,袂歕得,真久以前就買一支新的咧歕。

像數念阿爸對我的疼惜彼一般,我共這支口琴當做寶,永遠珍惜!

( 心情隨筆心靈 )
回應 推薦文章 列印 加入我的文摘
上一篇 回創作列表 下一篇

引用
引用網址:http://classic-blog.udn.com/article/trackback.jsp?uid=sann&aid=109336942