網路城邦
上一篇 回創作列表 下一篇  字體:
苦楝舅的思念
2017/12/07 11:22:27瀏覽169|回應0|推薦3

苦楝舅的思念


2016.08.18


秋雨一陣一陣,沃澹苦楝舅。

樹頂尾溜,予秋雨掖落下金黃色幼屑屑ê花蕊,這時陣,總會忍不住想起阿母。
阿母佇這个季節離開阮

今仔日,想起阿母講過伊ê囡仔時。

外媽生10囡仔,有六查某ê、四个查埔ê;阮阿母是第3查仔囝。
做田人,跤手愈濟愈好,外媽從來毋捌想欲共囡仔分人。

世間事,總有料袂到ê代誌會來發生。
阿母怹庄裡有一个生活會得過ê家庭,干焦生一个後生,知影外媽生真濟查某囝,就央人來欲分,而且指定上乖彼个:彼个上乖ê,就是阮阿母。

彼時伊5歲。

序大人若leh騙囡仔,總會嚇講:「若無乖,欲共汝分人。」
哪知影上乖ê,煞佇媒人三姑情、四拜託之下,分去庄內予hông做養女仔。
媒人講怹是欲予伊去好額人兜好命,毋是欲差用,會像親生查某囝按呢疼,tō按呢,開始養女的生涯。
  
5歲囡仔的心內,厝裡好額抑散食,毋是伊要意ê,伊欲挃ê- -是身邊有親阿娘。

轉去外家厝ê路,認真揣,知路了後,定定偷走轉去,伊ê阿娘總是等伊暗時仔睏去,閣抱倒轉去養母仔遐。
食人檳榔餅、tō是人的囝;雖然無檳榔嘛無餅,毋拘過戶予人做囝,著愛照品照行!

偷走無效,予人tshuā倒轉來,免不了一頓siù-se-á食甲飽。
後來落勻,日子順順仔過,養爸佮養母有疼惜,過幾何年ê好命。
 
佇阿嫂娶入門了後,伊的生命就變天。
養母仔佮阿嫂兩人,尻川抾相倚,欺負一个十外歲查某囡仔---阮阿娘。
阿母講,上蓋疼ê苦毒,tō是用針鑿伊的指甲肉……
女人何苦為難女人?
忍袂牢,閣偷走轉去外家兜。毋拘、嘛是勸伊倒轉去。
外媽毋是無惜這个查某囝,總是叫伊著認命……
認命的人生,汰會遮呢疼?

阮阿母18歲彼年。有一日,怹養母仔參阿嫂,共阿母咧睏ê眠床拆拆掉,掞去埕尾欲hiânn火。阿母歡喜甲,走轉去外家厝。講予怹阿娘聽,伊免閣倒轉去養母仔遐矣。因為...伊無眠床通睏。
這時陣,外媽已經無理由毋收留家己的查某囝。
 
阿母毋捌怨嘆怹爸母,共伊分人做養女仔,顛倒足感謝命運,予伊會當閣倒轉來親生爸母身軀邊,享受參親姐妹仔睏仝總鋪ê幸福。

聽二姐講,爸母猶佇咧ê時,有一工伊看著阿母家已佇房間流目屎。
二姐驚一下問伊呀啥代誌?
伊講想伊ê阿娘!

二姐彼時已經接近佛法,就共講:「伊呀,咱若信佛,另工往生了後,去佛的身軀邊學做佛,到時,咱欲看佗一个親人,無論是汝思念ê阿媽、抑是咱三姑,閣有濟濟親人,攏看會得著。」
伊呀心情轉歡喜問講:「啊佛敢袂嫌我頇顢?」
二姐講:「佛疼咱的心情,tō親像爸母疼囝的心情。」
:「啊欲按信?」
:「都唸南無阿彌陀佛,而且心內相信伊會疼惜咱,另工會教咱做佛!」
:「遮簡單?」

其實入信無簡單。
毋拘阮阿母自彼陣仔,心內tō有一尊佛。

講著阮阿母,關係伊ê故事會當講真久。
阿姐講,昨昏彼篇,有葱仔味…
無….今仔日tō講一下仔較趣味ê

彼陣仔阿母應該是欲倚六十歲矣,伊去一个楜椒工場做工課,工伴攏是參阿母頂下歲仔ê查仔人。
我拜六下晡時仔免上班(彼時陣抑未週歇兩日)。會騎車四界踅,有時去士林揣大姐,有時去冊店看冊,到甲阿母下班ê時陣,tō去工場門口等伊,載伊轉來。

伊參工伴行出來,看著我ê時,攏笑咪咪真歡喜;我知影伊ê歡喜,毋是有人載免用行ê,是伊ê工伴攏會呵咾伊ê查某囝,真乖!

有一日我載阿母,伊共我講:「阮同事看著汝,攏講怹厝裡好跤好手ê囡仔,較輸汝一个跛跤ê,毋捌想欲來共載一擺- -矣!」

我笑笑應講:「伊呀,後擺伊若閣按呢講,汝tō共教,叫伊共怹囡仔ê跤骨摃予跛跤,按呢就會來共載矣。」
伊呀坐佇機車後座,對我肩胛頭大下拍一下,罵講:「三八!」


六年前ê今仔日,七月半隔轉工,尾暗仔,哥哥對病院傳來一通簡訊:時間到矣!

後來聽二姐講,伊呀上落尾面帶笑容,安詳離開。

我按呢相信:伊呀一世人食苦,落尾安心轉去佛的身邊;親像細漢時經過苦難的養女仔生活,後來轉去親生爸母身邊共款ê….安心!

Ps:苦楝舅=台灣欒樹
 siù-se-á=細竹子


( 心情隨筆心靈 )
回應 推薦文章 列印 加入我的文摘
上一篇 回創作列表 下一篇

引用
引用網址:https://classic-blog.udn.com/article/trackback.jsp?uid=sann&aid=109336912