網路城邦
上一篇 回創作列表 下一篇   字體:
雲湖子的台語文創作-----咱來去騎鐵馬慶祝100年ê警察節
2011/04/06 20:50:19瀏覽198|回應0|推薦2

雲湖子(本文為台語文創作)

咱來去騎鐵馬慶祝100年ê警察節

 

作者/雲湖子(本文為台語文創作)

 

    彼工,教俺兩個囝仔學鐵馬,教到歸下晡,怹總算學會曉了,便開始騎著鐵馬四界踅,那親像細隻鷹仔初初學會曉飛仝款,是遮呢啊歡天喜地,一睏仔踅去東,我就綴咧看去東,等我目一 仔,煞咻一下!又閣走去西,害我欲看嘛綴袂赴看,只好徛在旁啊陪怹歡喜,欣賞怹的笑聲傳遍歸天頂,真是一幅好情景,予人永遠懷念。

    現子時,阮厝是住佇咧新竹縣竹北市,過一條頭前溪就是新竹市,縣市交界的所在,有一搭「河濱公園」,內面有一條差不多8公里遠的「鐵馬專用道」,遐是阮規家人的快樂天堂,定定哪是假日時啊,阮一家四人便一人一台鐵馬,外加阮兜的寶貝狗寶帝,規家人做伙,歡歡喜喜,來去頭前溪旁騎鐵馬。

    遐的「鐵馬專用道」非常有造型,是紅色的點仔膠路,中央有白色的分隔線。路的兩邊,一邊是台68線東西向快速道路;另外一邊,近的是農田風景,遠的有西濱大海風景,景色迷人,乎人一爿騎鐵馬一爿看風景,享受難得的親子休閒活動,實在是意義非凡。

    學會曉騎鐵馬的兩個猴囡仔,只要是有閒,便吵咧欲去騎鐵馬,乎我這個本來無愛運動的大箍呆警察,變成嘛是親像猴囡仔共款,哪無去踅兩輦啦,就會若像貪食鬼,食袂著啖糝,規身軀就會感覺礙謔,只差無在土腳起翱哞哞哮,哈哈!   

    頭前溪鐵馬道假日時啊人真濟,大家攏來騎鐵馬,集做伙歡喜來享受遮的好風景。遮不只風景美麗,而且嘛有觀光警察佇咧做管理。因此,環境清氣,更無汽機車亂亂闖,是一搭衛生又閣安全的休閒好所在。

    講著觀光警察,有一段趣味的故事發生。因為我嘛是警察,不過咱服務的單位是一般的行政警察,並袂使親像觀光警察的學長怹仝款,逐工騎鐵馬服勤,這種騎鐵馬服勤的情景,煞乎阮兩個猴囡仔感覺足稀奇咧,在怹頭擺見著穿著警察制服騎鐵馬的學長怹服勤時,那親像見識著新奇代誌,兩个人同時你一句來我一句去做伙大聲叫著:「哇!阿爸,您同事上班嘛也使來遮騎鐵馬喔?那按呢以後您上班時嘛也使 阮來遮耍囉!」「對啊對啊!阿爸您不是足愛騎鐵馬嗎?那按呢咱逐工來遮騎鐵馬好啦!」聽煞了後,我剎毋知欲按怎回答,不過有一個學長聽了了後,煞笑笑啊對阮兩個猴囡仔講:「恁阿爸加減時來騎一咧啊鐵馬也使,毋過那呼伊逐工騎,伊著無想欲來騎囉!」嘿嘿!學長講咧真實在。

騎來騎去,阮發覺,頭前溪鐵馬道嘛也使通到新竹市西濱海岸線17公里的「濱海鐵馬大道」。由遮到遐來回差不多有60外公里遠,那想欲騎一擺,真是一種大挑戰,毋過為著欲慶祝100年的「警察節」,我這位警察大人特別向規家伙啊建議,就在10065日,提早來一擺「咱來去騎鐵馬慶祝100年的警察節」特別活動,以便紀念100615日警察節這個特別日子,感謝警察這個單位賜我食賜我穿賜我飼著阮規家伙仔。

    好吧!就出發。當工透早,阮由「頭前溪鐵馬道」開始騎鐵馬,往西騎到盡頭轉東大路,順著指標到達「南寮漁港」。這個漁港是在民國三十八年完工啟用,面積有3.4公頃,是台灣早期頗具規模的港口,加上近海漁場遼闊,漁產資源豐富,平常時觀光客就足濟。內面有「新竹市漁會」,一樓有賣新鮮海產,二樓有餐廳,會使騎鐵馬返程時來這買一寡仔海產,互二樓餐廳代煮,才閣來規家伙享受著「海產大餐」,真有另外一番風味。

    由南寮漁港順著鐵馬道騎,便來到「防風林區」,沿路樹木成林,好親像進入迷宮仝款,一時找無路。好佳哉!沿路攏有路牌,是袂騎卡拍無去。

    繼續騎,就會到「看海公園」,遮會使北眺南寮漁港、運動公園全景;南看新竹焚化廠,雄偉外觀盡收眼底。「看海公園」上蓋有特色的所在就是西側插著真濟的鯉魚旗,隨風飄揚,十分壯觀,是遮的地標景觀。

    經過「看海公園」,閣來就是「海天一線看海區」。在遮一面會使欣賞到貝聿銘建築師所設計的「環保局辦公大樓」;另一方面,就是天成的海天一線美景,視野遼闊,海景一望無際。尤其是黃昏時,夕陽西下時分,紅霞遍布眼前,真是使人讚嘆的美景。

    無偌久,便到「港南風景區」。遮有一條「港南運河」,是闊量約好20公尺、長量約好1500公尺的水圳,有參「金城湖」相連;邊仔便是「港南公園」,內面有幾若攤煙腸攤,咱會使停一下,買一條啊煙腸來孝孤,加減來增加旅遊的趣味;金城湖有一搭「金城湖賞鳥區」,遐不管時攏有「新竹區賞鳥協會」的人士用望眼鏡賞鳥,那有興趣,會使免費欣賞鳥隻的生態。

    賞鳥了後,咱就向「紅樹林區」前進。彼帶是新竹市客雅溪甲海山罟的紅樹林,有規片的水筆仔,樹型細密而且大欉,樹林內嘛有澹地生態,咱會使欣賞招潮蟹佮花鰷魚的生態,乎囝仔增加大自然的見識。

    「紅樹林區」欣賞煞,可以進入「風情海岸」到「南港賞鳥區」一帶遊玩,一路有大型的「風扇發電機」、「風情海岸」景觀石佮由廢棄碉堡改建的便所;到「南港賞鳥區」,會使爬起二層樓高的觀海平台,眺望港區,觀賞專業漁區的作業情形,兼會使眺望香山灘地、海邊蚵架等景觀。

    最後,來到「南寮漁港旅遊服務中心」,它的外觀造型採用藍白兩色,有圓形的厝頂甲圓柱狀的觀景台樓層,面積佔闊有一千一百七十四平方公尺,內底有五層樓高的艦橋頂端保留觀景空間,觀景台部分有廿九公尺高,配有景觀升降梯,採光、夜間照明、欄杆扶手等設備,有人性化的服務。登上觀景台眺望四周,會使看到三百六十度美麗的海景,暗時看夜景,會閣卡美麗。

     一路騎來,差不多開掉一透早的時間,腹肚嘛差不多枵囉!好佳哉,阮水某仔早就準備餐點,互阮一家伙仔會當在「南寮漁港旅遊服務中心」邊看風景邊野餐,準備後一階段的鐵馬旅遊。

    歇睏點外鐘,阮便騎原路返程,這真是一遍難得的大挑戰,天氣雖然袂外熱,閣有海風陪伴,但是路途遙遠,嘛是真無簡單。尤其是阮彼兩個猴囡仔,小小年紀,嘛愛佮咱來辛苦,實在乎人心肝痛,但是,互人想袂到,阮兩个猴囡仔煞足有精神仔大聲對我講:「這是欲慶祝阿爸的節日,卡按怎嘛袂辛苦,顛倒阮感覺足好耍咧。」真是足感心,這兩個可愛的小寶寶。

    返程照原路,阮是騎騎停停,一來,回味原來風景;二來,調整體力,預定下晡五點外倒轉去「南寮漁港」,享受「海產大餐」。

    真無容易,終於到位,規家伙已經精疲力盡,雄雄煞騎袂落去,大家的雙腳已經開始疲疲捘,看來,上蓋幸福的,就是阮兜那隻寶貝狗,一路像嬰仔乎人揜咧,一點嘛嘛袂礙到,而且到「南寮漁港」了後,一放落土腳,便活潑亂跳,真正是一隻「好命狗」。

    哇!南寮漁港的海產真正是有夠青,俗閣好吃,規家伙點規桌菜,各類海產全齊,愛吃啥就有啥,而且按呢嘛才開台票2000元有找,吃咧真歡喜,連阮那隻好命狗嘛那親像枵鬼嘴,一直汪汪吠,討欲吃。

    吃飽了後,欣賞一下南寮漁港的黃昏,嘛也使去草埕上看人放風箏,差不多到暗時8點外,阮便準備打道回府,轉去阮厝仔歇睏。

    等轉阮厝時,已經是暗時9點外,雖然很疲勞,毋閣阮感覺足有意義。為著欲來特別紀念這100年的警察節,阮規傢伙不但舉辦這擺的「咱來去騎鐵馬慶祝100年的警察節」家庭騎鐵馬活動,我嘛特別用拄才學的台語文來創作,希望會當在這難得的節日當中,乎咱全國的警察同仁帶來特別的紀念。在此,阮一傢伙仔衷心祝福,全國的警察同仁闔家平安,中華民國一百年加油!

 

( 心情隨筆雜記 )
回應 推薦文章 列印 加入我的文摘
上一篇 回創作列表 下一篇

引用
引用網址:https://classic-blog.udn.com/article/trackback.jsp?uid=k493513&aid=5058988