「火煉的水晶」二二八台語文學展策展前言

　　佇台灣，少數的外來侵略者佮殖民者總是用亻因優勢政權的刀、銃佮重稅等等手段，對付原本就佇這塊島嶼生湠的本土族群，閣將台灣佮亻因的政治、經濟、文化牽纏做伙，這種情形佇台灣的歷史一直咧重複。遮的外來侵略佮殖民者，就是荷蘭、明鄭、滿清、日本以及佇1945年無故侵佔台灣的中國國民黨政權佮軍隊。徛佇侵略佮殖民者的對立面來看，台灣1947年的二二八事件並毋是「偶發」的，而是一直咧重複的悲劇的「必然」。四百年來，台灣佇這个「必然」的重複的悲劇內面，一直咧流血，台灣人的精神，嘛一直咧火煉。

　　1947年2月28日，是一般台灣民間所指中華民國流亡政府的中國國民黨政權，對台灣人民佮少數當時綴中國國民黨政權來台的新住民的二二八屠殺的開始日。同時，中華民國流亡政府也以這个事件為藉口，由1949年5月19日開始，對台灣人民執行長到38年，世界上久的一黨獨裁戒嚴佮白色恐怖統治，剝奪誠濟台灣人民回國攬抱家己土地的權力佮建立新國家的向望。

　　依照台灣予人殖民的歷史慣例來看，每一遍新的外來殖民統治者到位，攏會共前一个外來統治政權的跟綴者，歸入台灣人族群來對付。1947年的二二八事件，是台灣人對外來中國國民黨政權佮軍隊的反抗。當然，經過62年，中國國民黨政權、軍隊佮亻因的跟綴者，今馬佇台灣已經有一定的政治、經濟佮文化影響實力。因為按呢，這群人當然毋知予人殖民統治的滋味。毋過亻因猶是愛知影，一旦未來有新的統治者到位，62年前發生佇台灣人身上的悲劇，並袂放亻因煞，亻因仝款愛予人當做眼中刺，予人挽落來剁！了解二二八事件佮伊代表的意義，對現此時台灣每一个族群未來的命運來講，攏是真要緊的代誌，各族群的知識份子愛發揮道德良知，共娶領族群歷史命運的責任擔起來。

　　有人講，若無二二八屠殺事件，台灣人就無追求獨立建國的想法。毋過換一種思考方式，就是中華民國流亡政府的中國國民黨政權，當時透過美國接管台灣，若無本島地方士紳鼓舞人民去迎接佇中國敗戰的中國國民黨政權，佮接管後進行的統一思想教育，按呢台灣人民是毋是就會浮現選擇建立新國家的想法佮意志！

　　四百冬來，經過血統透濫的台灣民族，基本上是對部落社會進入予殖民主義者連紲統治的階段，長期予人殖民的結果，造成台灣人民普遍存在忍受屈辱佮順從的民族性。這種長期殖民外力的作用，其實已經弱化台灣人民自我獨立建國意願表達的能力，甚至毋知民族自決早就是一種普世價值。因為按呢，台灣人民佇真無意識的狀態，繼續接受中華民國流亡政府的中國國民黨政權的獨裁統治，毋過這種猶無自覺的無意識狀態，煞予一部份人誤認「若無二二八屠殺事件，台灣人就無追求獨立建國的想法。」

　　二二八的受難者，絕大多數攏是講台語的台灣人，只有用台語才有法度深刻重現亻因受難的聲音。為著欲連接台灣民族受難的聲音佮反抗的精神，咱特別邀請22位台灣詩人作家的台語文學作品參展，編印這本二二八台語文學展《火煉的水晶》。水晶透明真純，親像台灣人的本質，水晶真濟切面，若像每篇參展的作品各別呈現整個事件無仝的面向，有受難者的特寫、有事件的現場、嘛有撫慰受難者的安魂曲。透過現代詩佮小說的筆法，記錄二二八屠殺事件，重建台灣民族心靈創傷的文學冊。文學無法度平反歷史，也無法度洗清冤屈，毋過文學會使顯影台灣這塊清翠水晶染血的痕跡，會使予台灣民族的後代瞭解過去，堅心建國的理念佮意志。

　　受難若是代表一个民族靈魂的火煉，咱台灣民族久長的傷痕，就會昇華，永遠深刻佇水晶光炫的面容。

　　　　　　　　　　　　　　　　　　　　　　台灣文學藝術獨立聯盟 謹識

　　　　　　　　　　　　　　　　　　　　　　　　　　　　　2010. 1. 5