【番薯島ê命運】    閩南語現代詩／錡亮

　　　記228事件67年週年

【1】

人是枋仔壁頂ê釘仔

心事一半沬壁內，封喙

另外一半予白賊氧化，生鉎

過著縛索記代誌ê日子，散食ê

物質生活，番薯簽配鹹魚

欲望ê青苔生佇逐粒頭殼頂

苦楝仔含佇喙內，聽阿嬤講

愛鹽花仔豉過，去除苦水才會甘蜜

官方ê講法是毋捌散去ê雺霧，掩崁視線

事實真相來自厝邊頭尾流傳ê耳語

經過官廳層層ê眼線佮檢查哨ê鉛線網

火金蛄透出青色ê貓霧光，冷靜

佇烏暗ê夜幕若有若無，煞毋捌消失

良心轉入地下透流，攏會揣著出口

靈感，會齊成水潭，照出雲影

【2】

閣有人半暝予挵門ê牛頭馬面tshuā走

知己ê朋友就是可能ê密告者

葉仔面頂露水無聲無說焦燥

銃子下底，泏出ê血水真緊ê滲入塗沙

死者ê喊聲對地下傳來應聲

雖然大多數ê人，猶原乖巧溫馴

袂輸蟲仝款咧蟯蟯趖，儘量避免衝突

避免磨破記性ê傷痕

避免貼佇身軀時清楚聽著

互相心聲內底無可奈何ê驚惶佮咬牙切齒ê悲傷

無人該然在生時，就領受審判

以無影無跡ê罪名，除非上帝親臨

無人該然掛佇生離死別ê窗邊

含著目屎，無奈ê nih-nih看性命予譀譀ê風吹焦

親人予獨裁者擲佇無看白日ê烏牢

予滯佇石磨，粉骨碎身

只為着予這塊島嶼閣較真肥

逐粒生滿臭腥ê果子

【3】

逐葩燈火邊堆積飛蛾ê翼股

逐張拋網內面纓纏人魚ê愛戀情愁

逐粒人心攏是貧血結趼，激袂起一絲仔熱情

白色年代，無所不在ê威權律法

無所不在ê蜘蛛網纓纏恐怖佮冤屈

白色毋是寧靜和平，是一種輻射

一種光害迵過人心，使人無從欺瞞

全然ê看出出，無隱私無秘密

若親像一張張白紙，據在各種色水亂皂　

陷害各種無疑悟ê罪名

白色是零下尚低時，吐大氣ê雲尪

是惡夢ê霜雪，射出百樣ê邪魔鬼怪

食人血肉攝人神魂，假律法之名

君權ê國家

戀戀北迴線