──2018彰化縣台語文學創作比賽評審感言

   秋天，又閣行到尾溜矣。風，毋但有一寡仔透，閣真涼冷。

   照舊年的風勢，我沙微的目睭，當無閒咧看咱彰化一年一期的台語文學作品，仝款是台語詩組，今年，國校中年級有43件，高年級有110件，國中組有62件，教師組有24件，總件數239件，有夠拄好，竟然和頂屆相仝。國校中年級佮國中增加袂少，顛倒教師組只賰舊年的三分之一。這代表啥物意義呢？值得咱來思考。

   照往例，我定著愛共咱這陣辛勞的母語老師拍噗仔一下，尤其支援老師，佇無蓋好的待遇佮環境之下，猶原願意遐爾仔拚勢，無惜代價，來指導咱學生囡仔寫作、投稿，有影感心。

   可惜，除了國校以外，咱國中以上的學校並無母語課程，甚至連母語社團都無，實在有夠拍損，無彩咱這陣優秀的母語老師，根本是英雄無用武之地。所以佇遮，我欲繼續重複舊年的建議──

   誠心誠意，共咱縣府建議，向望會使透過行政程序，予咱每一間國中，每一个年級，逐禮拜，利用彈性課程安排一節母語課，初步若無法度逐年級攏有，會當一年一年沓沓仔來，經費開佇遮，算盤按怎擉（tia̍k）就會和（hô）啦，因為母語是咱民族咱土地的根，根若斷，咱是欲提啥物來認捌祖先的面容咧？

   若無，至少逐間國中，嘛愛撨（tshiâu）一个母語社團啊，予有趣味的囡仔有一个機會好學習，社團是包含佇正課內面，免閣另外開錢，而且全校攏總才設立一班，無可能會影響學校原來的運作，毋過按呢，咱對國校一路行來的母語教育，就會當接續落去，一校干焦有30个學生嘛好，全縣42間國中，就有千幾个台語囡仔會當生湠……定根佇國民教育的母語教育，才是真正久久長長的教育！

最後，嘛是定定咧講的代誌，愛盡量提供淡薄仔獎金啦，予得獎者有實際的鼓勵，這，濟少會提升比賽作品的質，對量來講，決定嘛是有幫贊。堂堂一个縣級的文學比賽，得獎者竟然一箍銀都無，敢講會過？無，禮券、獎品嘛好。

雖罔，話是有淡薄仔顧人怨，總是，一粒疼心啦。相信，咱攏誠期待，彰化是一个有未來、有氣質的城市；是講，氣質著愛對關心母語文學起鼓，才有媠氣的未來。咱知，春天，猶閣真遠，毋過，定著會來。

(陳胤/2018/10/30)