*(演講稿)

艱苦頭，快活尾                

各位評判老師、各位同學，逐家好！  (行禮) 

我是第○號，今仔日欲演講的題目是：艱苦頭，快活尾。

         想起讀國校四年的時，看著厝邊仔的阿玲，逐工若(nā)放學轉來，就騎跤踏車佇社區內踅(se̍h)來踅去誠快樂，我足欣羨的，就共(kā)阿爸講我嘛欲騎跤踏車，阿爸上惜我，過二工仔就買一台粉紅仔色的跤踏車予我，我是歡喜kah笑微微，隨共跤踏車牽咧就伐(hua̍h)起去騎，跤踏無幾下，人佮車就趨倒落矣(ah)！阿娘喂！若會按呢？哇！跤頭趺(u)鑢(lù)破皮流血矣！頭殼額仔(thâu-khak-hia̍h-á)嘛有摖(tshè)著傷，足疼的，我沓沓仔(ta̍uh-ta̍uh-á) peh起來，心內想講我應該會曉(ē-hiáu)騎跤踏車才著矣！

         後來，阿爸共阮講萬項事志攏是「艱苦頭，快活尾。」講騎跤踏車是著愛先學(o̍h)會曉的才會當家己騎咧走，咧學騎的時邊仔愛有人鬥扞(huānn)咧，才未發生危險，講阿玲嘛是in阿爸陪伊學規個月才會曉騎。阿爸koh講：「毋管學啥物，攏嘛先艱苦頭，才有快活尾。」讀國中以後，我就較會曉想，知影「艱苦頭，快活尾。」就是先苦而後甘的道理，序大人嘛定定用這句話來勉勵序細愛好好仔讀冊，將來才有出脫。

         佇讀冊學習的科目，我對台語文嘛真有興趣，佇學校有參加「台語社團」，就是想欲加學一寡。台語的四大領域(líng-hi̍k)聽、講、讀、寫，聽佮講較無問題，因為自細漢厝裡佇日常生活中攏有咧講台語，讀國校的時嘛有台語課，啊若讀佮寫，台語老師講必須愛經過學習訓練才會曉的。

         佇「台語社團」，koh對(uì)台語音韻系統的三要素－聲母、韻母、聲調學起，老師講台羅拼音若學會曉的，佇朗讀文章的時，發音會較正確，講台語嘛會較滑溜，啊若拄著未曉讀的字才會當查字典來拼音捌字，台語用字若愈(jú / lú)捌愈濟，就會當學寫作，而且台語就是愛靠文字佮台羅拼音，漢羅併用(pīng-iōng)文化才會當世代傳承落去。

         我感覺台羅拼音真歹學，自國校就記未起來，聲母、韻母、聲調我知影，毋過咧練習拼音的時陣，就是拼未準音，攏會走精去，誠失志。老師一直共阮鼓勵講：「艱苦頭，快活尾。」koh講俗語講：「字是隨身寶。台羅拼音一定愛學起來。」

         台語用字我有捌一寡，毋過若欲寫文章猶是無法度，我這擺報名欲參加演講的時，台語老師鼓勵我試看覓(māi)的家己學寫演講稿，結果我猶是寫未出來。「艱苦頭，快活尾。」這句話足有意義(ì - gī)的，我欲用來勉勵家己，從今以後，我會koh較拍拼學習，一定欲共台羅拼音學予熟，而且加強學習台語用字，有一工才會曉寫台語文章，向望後擺參加演講的時，我會當為家己寫一篇台語的演講稿。

        我的演講就講到這結束，多謝逐家！
minda 2014.11.8