拜七娘媽                                     

      七月初七，古早例是愛拜七娘媽，現代的少年人煞攏咧過情人節。 

      好友來咧祝福阮(gún)情人節快樂，心內有歡喜，喙是開聲哈哈大笑，

想講少年時有情人彼當陣，曷(a̍h/ ia̍h)無人咧興過情人節，這馬老矣煞

有情人節。囝兒大漢矣，攏會曉共爸母滾耍笑：「爸、 媽啊！祝福情

人節快樂！」哈！ 阮只好koh佮翁婿互相做一工的情人啦！ 

      七月初六下晡，佮查某囝去附近的黃昏市仔買菜，一入市場就拄(tú)

著一位阿桑提花咧賣，「買花！買花！拜七娘媽愛用的。」查某囝就

問阮欲買無？阮應講：「咱無欲拜，花汝若有佮意就共買。」查某囝

揀( kíng)一束較媠的買落來。 

       轉到厝裡，共花插咧花矸(一支雞冠花、二支圓仔花、三支七里香)，

囥佇客廳看媠。查某囝有問阮為啥物情人節愛拜七娘媽？為啥物愛拜

這花？想著故鄉早年是有拜七娘媽，毋過用的花是無同ôo。 

      彼暗，有共查某囝講起阮細漢時，故鄉拜七娘媽的情形，彼當陣，

佇七月初七下晡四、五點，阿媽佮阿母攢(tshuân)足豐沛的，阮(guán)

兄弟姊妹仔規陣，夯(giâ)椅夯桌排咧門口埕，跤手足扭掠(liú-lia̍h)的鬥

捀(phâng)物件上(tsiūnn)桌，排到滿滿，阿媽差教(tshe-kah)阮去門跤口

挽胭脂花佮素日春，叫小弟捀面桶水，阿母提來一條新面巾袚(phua̍h)

咧面桶頂，koh有細盒粉餅、紅紗線等，攏準備好勢了後，阿媽就燒香

拜拜，聽伊嘴內踅踅唸講足久的，阮問阿母看阿媽是咧講啥貨？阿母

講是咧請七娘媽愛保庇阮兄弟姊妹仔攏會當身體勇健、平安大漢。阿

媽拜煞就換阿母拜，阿母嘛共七娘媽講足濟話的，等阿母拜好就輪著

囡仔拜矣，阮兄弟姊妹仔分開予阿媽佮阿母牽咧拜，先共七娘媽稟報

阮的名，才請伊保庇阮𠢕(gâu)讀冊、乖巧、好教示……等等，後來阿

媽佮阿母燒一寡經衣、金紙送予七娘媽，燒了就算拜好矣。         

      紲落(suà--lo̍h)，阮兄弟姊妹仔就排隊洗面、洗手講會保平安，才共

物件收入厝內，準備食暗頓，這時陣，阿媽會講共粿(kêr)仔留予伊，

按俗例是愛共拜過的粿仔擲上(tàn-tsiūnn)厝頂，阿媽講會食的物件擲

khiú厝頂足拍損的，誠毋甘，就用手捻(liàm)幾塊仔擲起去，講意思到

就好矣！ 

           阮兄弟姊妹仔大漢以後，就毋捌koh佇七月初七拜七娘媽矣。  

                                          minda 2010.8.16  (2018.8.17修)

附註：

1、阮(gún) ：我。

2、阮(guán) ：我們。

3、曷(a̍h / ia̍h)：何必、何須、哪。反問語，表示疑問。

4、koh(閣)：又、再、還。

5、拄(tú)：相遇、遇見。

6、揀(kíng)：挑、選。

7、攢(tshuân)：張羅、準備。

8、夯(giâ)：扛。

9、扭掠(liú-lia̍h)：形容手腳快、動作敏捷。

10、捀(phâng)：用手端著。

11、差教(tshe-kà / kah)：差遣、使喚。

12、胭脂花：煮飯花。

13、素日春：日日春。

14、袚(phua̍h)：披、掛。　

15、踅踅唸(se̍h-se̍h-liām)：喋喋不休。

16、紲落(suà--lo̍h)：接下去。接下來。

17、粿(kêr、ké、kué)仔：是挨米做的粿，先挲(so)一粒圓圓

       才揤(tshi̍h / ji̍h)予扁(厚約1公分，直徑約6~7公分)，一塊

    一塊排入籠床(lâng-sn̂g)用大灶來炊，炊熟後是芳koh𩚨(khiū)，

    食的時愛搵(ùn)糖湯。　

18、擲(tàn)：丟、投出東西。

19、khiú：上去。

20、捻(liàm)：捏、擰。

(網圖)    澎湖七夕拜七娘媽，粿仔保留傳統味。

劉志祥老師回應分享:

七夕抬頭望碧霄

喜鵲雙雙拱鵲橋

星辰星語許心願

願情人節心微笑

快樂志工回應分享:

脖子還綁紅線ㄋㄟ[捲 汗]~我還帶到國中畢業哩 !

min回應分享:

台南有做十六歲的習俗，小孩在滿十六歲這年要去七娘媽廟拜拜，

謝謝七娘媽的保佑。而現在每年的七夕市政府都會舉辦府城做十六

歲的一系列活動！

ET/夢生/Yuh/Ru回應分享:

佇我的記持內底，我就完全毋捌看過拜七娘媽的風俗，所以，我嘛

毋知影阮故鄉是毋是有人咧拜七娘媽，這款的民俗活動可能愛真正

去做田野調查才會知影到底猶有偌濟人會佇七夕拜七娘媽，毋知影

，做十六歲是毋是賰台南才有咧做， 因為新聞逐遍攏是報台南，

其他的所在就無聽過。

min回應分享:

以前小孩時媽媽都會在年節和七夕時拜床母(一稱鳥母)，而據說床母

就是七娘媽，媽媽說拜床母是要拜到滿十六歲這年，以後就不用再拜

了，而且要拜之前媽媽還會要我們先去洗手面！等到為人母時，媽媽

也是這樣交待，一定要拜到十六歲才行，而拜床母是在房間裡拜，要

準備一碗飯一碗麻油雞，還要準備鳥母衣   (紙錢)，那是要給床母的，

拜託衪保祐小孩平安長大！

帥安回應分享:

府城作的十六歲就是拜七娘媽 ， 很熱鬧，我最有興趣的是像你說的

那些供品， 跟其他神明不同。

33回應分享:

查某囡有問阮為啥物情人節愛拜七娘媽？

...無仝年代的人出發點無仝...

我這咧歲會問講...是按怎七娘媽生變做情人節   ?

少年人是問...為啥物情人節愛拜七娘媽？

毋知會閣幾年...人就會毋知影[七娘媽生]佮[情人節]

是佗一項先出現的否？

台語聞香回應分享:

阮細漢時也有拜七娘媽，供品攏差不多，但一定有蒸油飯。七娘媽

是囝仔的守護神，較早囝仔十六歲就算是大人，所以纔有做十六歲

﹝成年禮﹞的例，聽講雲林元長做十六歲的禮數上隆重。

(2010.8.16) https://blog.xuite.net/khingbi/twblog/146026638