我嘗試以漢字、客家語海陸腔作書寫。這是其中的一篇作品。文末有一句客家諺語「賺錢可比針挑ned ，使錢就像水推沙」，意思是賺錢像用針挑刺一般困難而花錢卻像水沖沙一般容易；勉勵生活要從節儉做起。

ngai 主持一個家庭，定時會拼掃屋下。有一擺清潔準備愛過年，將屋肚个櫃仔、桌凳全部抹到淨淨俐俐；做好咧，洗手，手骨有刺刺个感覺，原來係手指頭分xienˊ刺著。還細个時節，我看過阿姆擎等一枚針，輕輕仔挑手巴掌皮 ─ 挑竻 。ngai 試用手指甲愛將xienˊ挷出來，無法度，只好拿出一枚幼幼个針，屎朏頭夾等、吸一口氣，用針頭挖開xienˊ 唇个肉，xienˊ就跈等血出來，連目汁也流出來咧。      

屋肚：屋內。淨淨俐俐：乾乾淨淨。細：這裡表示小孩。分xienˊ刺著：被刺刺到。 挑竻：挑出刺來。屎朏頭：屁股。跈等：跟隨著。

ngai還係細人个時節，阿爸係公務人員，日時頭出外上班；阿姆耕田合種菜，十分無閒，常透做到兩頭烏；阿婆在屋肚度ngai 兜姊妹，煮飯分ngai 兜食；ngai 兜摎阿婆感情最好。ngai 婆當性格，一向都係打赤腳，在屋肚、隔壁鄰舍行上行下。只有愛坐車去街路个時節，正會著一雙布鞋；轉到屋下，鞋就脫忒放到眠床下。阿婆一年轉一擺外家，食晝个時節佢單淨食雞酒，連等幾下碗，食到面紅紅、嘴角笑弛弛。屋下，阿姆也有畜頭牲，畜大就賣分頭牲販仔，換錢落袋。有一擺，雞販仔來收雞仔，ngai 同阿婆講，留一隻雞仔好煮雞酒食；阿婆講：「細人仔愛知，省食有伸，省著有新。」

細人：小孩。做到兩頭烏：天未亮出門工作天黑才回家，比喻非常忙碌。

頭牲販仔：購買家禽的商人。脫忒：脫掉。省食有伸省著有新：比喻節省就能有積蓄。

ngai 兜漸漸大，屋下生活緊來緊改善，背尾戴兩棧樓。ngai 感覺最好个事情就係逐隻位所都有安電火，連屋後尾个便所也有換大盞火咧。毋過，大人个習慣係天暗正開電火，有人在該位所開火，人行開嚴時就關忑；ngai 婆講：「一日省一兩，十年拿倉裝。」

背尾：後來。戴兩棧樓：住兩層樓。一日省一兩十年拿倉裝：比喻節省有積沙成塔的功效。

這下係二十一世紀、電子時代，生活設備電器化，各種用品新合好。毋過，ngai 盡量維持簡單个生活習慣。比論講洗衫褲，ngai 大體用茶箍摎洗衫粉，無用洗衣精、濃縮精；省錢合較毋會損壞水質。還有通訊个用品一時換一樣，這下當多人用新型个智慧型手機仔，目珠看過去，逐儕隨時都係頭犁犁緊看等手巴掌个手機仔；莫怪臺灣一直近視个人特別多。ngai 原在用簡單型个手機仔，毋單淨省錢也較康健。老古人講个「賺錢可比針挑竻，使錢就像水推沙」，正係正正个「智慧」咧。

茶箍：肥皂。合：和。逐儕：每一個人。原在：仍然。毋單淨‧‧也較：不僅‧‧也比較。